Máýlen Áshimbaev Knesset Spıkerine iltıpat bildirip, qazirgi tańda Qazaqstan men Izraıl arasyndaǵy qarym-qatynas kóptegen salada qarqyndy damyp kele jatqanyn atap ótti. Sondaı-aq ol joǵary deńgeıde syndarly saıası dıalog jolǵa qoıylǵanyn aıtyp, Izraıl Prezıdentiniń Astanaǵa jasaıtyn aldaǵy resmı sapary eki eldiń baılanysyn ári qaraı damytýǵa serpin beretinine senim bildirdi.
Kezdesýde Memleket basshysy Qasym-Jomart Toqaevtyń bastamasymen Qazaqstanda júrgizilip jatqan áleýmettik-ekonomıkalyq jáne saıası reformalardyń iske asyrylý barysyna da basa mán berildi. Izraıl Knessetiniń Spıkeri Amır Ohana atalǵan reformalardyń nátıjelerin joǵary baǵalap, barlyq baǵyt boıynsha baılanysty keńeıtýge múddeli ekenin jetkizdi.
Sonymen qatar Senat Tóraǵasy parlamentaralyq yntymaqtastyqty odan ári jandandyrýdyń mańyzyna nazar aýdaryp, aldaǵy ýaqytta zań shyǵarý salasyndaǵy ózara is-qımyldy damytý máselelerine toqtaldy.
«Qazaqstan Prezıdenti Qasym-Jomart Kemeluly Toqaevtyń bastamasymen elimizde ulttyq ekonomıkany ártaraptandyrýǵa jáne ınvestısııalyq ahýaldy jaqsartýǵa arnalǵan aýqymdy reformalar júrgizilip jatyr. Osy oraıda biz Izraıl Knessetimen ınnovasııalyq damý, sý resýrstaryn basqarý, aýyl sharýashylyǵy jáne taǵy basqa salalarda zań shyǵarý baǵyttary boıynsha tájirıbe almasýǵa múddelimiz. Mundaı naqty qadam Senat pen Knessettiń salalyq komıtetteri men dostyq toptary arasynda turaqty baılanys ornatýǵa jol ashatyny anyq. Sondyqtan aldaǵy ýaqytta eki el depýtattary arasyndaǵy dıalogty júıeli túrde jalǵastyramyz dep senemiz», dedi Máýlen Áshimbaev.
Kezdesý barysynda suhbattasýshylar birlesken jobalardy da talqylady. Atap aıtqanda, aýyl sharýashylyǵyn jáne agroónerkásiptik sektordy damytý, zamanaýı jylyjaı keshenderin jáne tamshylatyp sýarý júıelerin óndiretin zaýyt salý, sondaı-aq, sý ınfraqurylymyn jańǵyrtý baǵytyndaǵy jobalardy iske asyrýda ózara járdemdesý máseleleri sóz boldy.
Budan basqa, taraptar Álemdik jáne dástúrli dinder kóshbasshylarynyń «Dinder dıalogy: bolashaq jolyndaǵy sınergııa» taqyrybyna arnalǵan VIII sezine toqtalyp, atalǵan forýmnyń kún tártibindegi basym baǵyttardyń ózektiligin talqylady.
