Qazir kóppáterli úılerde jylýdy esepke alýdyń jalpyúılik esepteý qurylǵysy ornatylǵan. Jylý tólemderi páterdiń aýdanyna jáne belgili bir ýaqyt kidirisimen esepteledi. Buǵan deıin qala turǵyndary tarapynan kommýnaldyq tólem baǵasyna qatysty birizdiliktiń joqtyǵyn aıtyp, shaǵymdanýshylar kóbeıgen edi.
«Búgingi kúni esepteý qurylǵylary tek úıdiń jalpy shyǵynyn ólsheıdi. Osy sebepti tólem páterdiń kólemine qaraı jáne azdaǵan ýaqyt aıyrmasymen qalyptasady», dep túsindirdi E. Dosaev.
Onyń aıtýynsha, qala qazirdiń ózinde ár páter boıynsha naqty tutynýdy baqylaýǵa múmkindik beretin sıfrly esepteý júıesine kóshýdi bastap ketken.
«Bıyl biz esepteý prosesin sıfrlandyrýdy bastadyq. Basty maqsat – ár páter boıynsha jylý tutynýdy jeke esepke alyp, turǵyndar naqty qansha jylý tutynylǵanyn jáne qandaı temperatýrada ekenin kórip otyratyndaı etý. Jumys aıaqtalǵan soń sizder tólem eseptelgennen keıin birden onlaın rejımde shotyńyzdy kóre alasyzdar dep úmittenemiz», dedi qala ákimi.
Bul júıeni tolyq engizý 2025-2026 jyldary aıaqtalady dep josparlanyp otyr. Osydan keıin almatylyqtar jylý tólemin onlaın túrde naqty ýaqyt rejıminde kóre alady.
