Osy túıtkildi máseleler oblystyq máslıhattaǵy AMANAT fraksııasynyń otyrysynda talqylandy. Depýtattar jaýapty mekemelerden naqty sharalar men júıeli baqylaý talap etti. Fraksııa múshesi, oblystyq máslıhat depýtaty Baqyt Ataıbekov respýblıkalyq trassalardaǵy qaýipsizdik talaptarynyń saqtalmaýyn synǵa alyp, bul jaǵdaıdyń saldary kimniń moınynda ekenin ashyq surady.
«Jol boıynda adam qaza tapsa, jaýapkershilikti kim moınyna alady? Trassanyń eki jaǵy da qorshalýy tıis. Biz bul joldarǵa aqy tólep otyrmyz. Kóp elderde mundaı joldar tolyq qorshalady. Al bizde mal ólip jatsa, ıesin sottaıdy. Aldymen jol ıesin jaýapqa tartý kerek shyǵar? Jol boıy qarańǵy, jaryq joq. Bul respýblıkalyq jol. 25 jyldyq kepildikpen salynǵan. Sonda bul kepil kim úshin, ne úshin beriledi?» - dedi depýtat.
Máselege qatysty jaýap bergen «QazAvtoJol» UK» AQ Almaty oblystyq fılıaly dırektorynyń orynbasary Abzal Kóktaluly birqatar jobalardyń qolǵa alynǵanyn atap ótti.
«Almaty–Qonaev, О́skemen–Almaty jáne Almaty–Horgos baǵyttaryndaǵy joldarǵa jaryqtandyrý men qorshaý ornatýǵa arnalǵan jobalyq-smetalyq qujattamalar ázirlendi. Bul jumystar aqyly joldardyń qarajaty esebinen júzege asyrylady. Sonymen qatar, ótken jyly oblysta jalpy uzyndyǵy 172 shaqyrym avtojol paıdalanýǵa berildi. Onyń ishinde Shamalǵan stansııasyn aınalyp ótetin joldar bar. Al bıyl 109 shaqyrym jolda qaıta jańǵyrtý jumystary júrgizilip jatyr. Onyń ishinde Uzynaǵash-Atar – 42 shaqyrym, Kúrti-Qonaev – 62 shaqyrym», – dedi ol.
Oblys aýmaǵynda kúre joldardyń boıynda 150-den astam jol ótkeli men kópir, 1525 shaqyrym qorshaý jáne 121 shaqyrym jasyl jelek ornalasqan. Alaıda olardyń kópshiligi eskirgen jáne tehnıkalyq kútim men jańǵyrtýdy qajet etedi. Osyǵan baılanysty 2025 jyly joldardy kútip ustaýǵa arnalǵan 16 arnaıy tehnıka satyp alý josparlanyp otyr. Budan bólek, respýblıkalyq mańyzy bar jol ótkelderi men kópirlerdi jóndeýge bıyl 5,6 mlrd teńge bólingen.
Jol sapasyn baqylaý boıynsha «Jol aktıvteri sapasynyń ulttyq ortalyǵy» ShJQ RMK Almaty oblystyq fılıaly da óz esebin usyndy. Fılıal dırektory Erbolat Kóshtaevtyń málimetinshe, 2024 jyly 23 avtojol jobasy men 199 kóshe-jol jelisi tekserilgen. Júrgizilgen zertteýler nátıjesinde 1085 synama alynǵan, onyń 28 paıyzy qurylys normalaryna saı kelmegen.
Fraksııa otyrysynda AMANAT partııasynyń múshesi, oblystyq máslıhat depýtaty Rústem О́tembaev ta Qarasaı aýdanyndaǵy oblystyq mańyzy bar joldardyń ahýalyna qatysty másele kóterdi.
«Irgeli aýyldyq okrýgine qarasty Kóksaı, Irgeli jáne Kemertoǵan aýyldaryndaǵy oblystyq mańyzy bar joldarǵa sońǵy úsh jylda eshqandaı kútim jasalmaǵan. Joldar kúrdeli jóndeýdi qajet etedi, trotýar múlde joq. Joldarǵa jaýapty mekeme – TOO «Depol» qarjy alyp otyrǵanymen, jumys júrgizbeı otyr. Bul jaǵdaı nege baqylaýǵa alynbaı otyr jáne naqty qandaı sharalar qabyldanbaq?» – dedi ol.
Bul máselege baılanysty oblystyq jolaýshylar kóligi jáne avtomobıl joldary basqarmasy atalǵan eldi mekenderdegi joldardyń tehnıkalyq jaǵdaıyn zerdeleý maqsatynda jaqyn kúnderi monıtorıng júrgiziletinin habarlady.
Otyrysta qozǵalǵan máseleler boıynsha AMANAT fraksııasy jaýapty organdardan sapaǵa baqylaýdy kúsheıtýdi, naqty jaýapkershilik júıesin engizýdi talap etti. Depýtattar barlyq kóterilgen problemalarǵa qatysty tıisti vedomstvolarǵa resmı saýaldar joldanatynyn jetkizdi.
Almaty oblysy.
