Is-sharaǵa Májilis depýtattary, eriktiler, áleýmettik qyzmetkerler, qarttar jáne áleýmettik osal toptardyń ókilderi qatysty. Jıynda sıfrlyq gıgıena, ınternet alaıaqtyqtan qorǵaný, smartfondardy qaýipsiz paıdalaný, onlaın-bankıng jáne eGov portalynyń qyzmetterin paıdalaný boıynsha ádistemelik materıaldar usynyldy.
Májilis depýtaty Ekaterına Smyshlıaeva atalǵan joba aıasynda ázirlenip jatqan «Qazaqstan Respýblıkasynyń sıfrlyq kodeksi týraly» jáne «Jasandy ıntellekt týraly» zań jobalary eldegi sıfrlyq damý men azamattardyń qaýipsizdigi arasyndaǵy tepe-teńdikti saqtaýǵa baǵyttalatynyn atap ótti.
«О́mirimizdiń barlyq salasy sıfrlandyrylyp jatqan qazirgi kezde bul joba erekshe ózekti bolyp otyr. Ásirese, zeınetkerlerge kómek kórsetý asa mańyzdy. О́kinishke qaraı, sońǵy jyldary ınternet-alaıaqtardyń qurbanyna aınalyp jatqan qarttar kóbeıip ketti. Alaıaqtardyń eń basty qarýy – azamattardyń sıfrlyq saýatsyzdy. Sondyqtan turǵyndarǵa sıfrlyq qaýipsizdiktiń negizgi erejelerin túsindirip, jeke basqa qatysty derekterdi qalaı qorǵaýdy úıretý mańyzdy», – dedi Ekaterına Smyshlıaeva.
Tusaýkeser rásiminen keıin jıynǵa qatysýshylarǵa fıshıngti anyqtaý, qurylǵylardy baptaý jáne ınternettegi yqtımal qaýipterge qarsy áreket etý boıynsha tájirıbelik kómek kórsetildi. «Jastar rýhy» jastar qanaty tóraǵasynyń orynbasary Erjan Hamıtovtyń aıtýynsha, aldaǵy ýaqytta oblystyń barlyq óńirlerinde osyndaı is-sharalar ótetin bolady.
Joba aıasynda ata-analar jınalystary, mektepterde «Kıberqaýipsizdik» sabaqtary, zeınetkerlerge arnalǵan «Kúmis lıga» sıfrlyq ortalyqtary, sondaı-aq sıfrlyq volonterlerdi oqytý men arnaıy ınteraktıvti kýrstar uıymdastyrylmaq.
Qostanaı oblysy
