Forýmda qatysýshylar ózara is-qımyldy nyǵaıtý jáne adamzatty alańdatyp otyrǵan ózekti problemalardy eńserý tásilderin jetildirý jóninde pikir almasty. Is-shara aıasynda Senat tóraǵasy Dúnıejúzilik ıslam lıgasynyń basshylyǵymen kezdesti.
Máýlen Áshimbaev dóńgelek ústelge qatysýshylarǵa iltıpat bildire kelip, qazir búkil álem jańa jahandyq syn-qaterlermen betpe-bet kelip otyrǵanyn atap ótti. Sondaı-aq ol osyndaı almaǵaıyp kezeńde atalǵan aýqymdy is-sharany uıymdastyryp otyrǵan Dúnıejúzilik ıslam lıgasy men Álemdik jáne dástúrli dinder kóshbasshylary sezi hatshylyǵynyń mıssııasy aıryqsha mánge ıe ekenin, bul bastama halyqtar, mádenıetter jáne dinder arasyndaǵy baılanysty jolǵa qoıýdy kózdeıtinin aıtty. Búginde geosaıası shıelenis, ekologııalyq jáne ekonomıkalyq turaqsyzdyq, pandemııa sııaqty túrli problemalar búkil álemniń damýyna aıtarlyqtaı teris áserin tıgizip jatyr. Osy rette ártúrli konfessııalardyń, halyqaralyq jáne saıası uıymdardyń ókilderin biriktiretin dóńgelek ústel ótkizý syndarly dıalog qurý jolyndaǵy mańyzdy jáne ýaqtyly alań ekeni anyq.
«Biz qazirgi syn-qaterlerdiń, eń aldymen, ýshyǵa túsken geosaıası shıelenistiń saldaryn eńserý jolynda kúsh-jigerimizdi biriktirý úshin qasıetti jerde jınalyp otyrmyz. Búginde Taıaý Shyǵysta, Palestınada, Gazada qıyn jaǵdaı qalyptasyp, beıbit turǵyndar zardap shegýde. Bul máselede qantógisti dereý toqtatyp, saıası dıalogti jandandyrý qajet. Atalǵan úderiste Dúnıejúzilik ıslam lıgasy mańyzdy ról atqarady. Sondaı-aq dinge, násilge jáne senimge qatysty kemsitýshiliktiń barlyq túrin aıyptaıtyn Mekke deklarasııasynyń mańyzy men máni zor. Qujat álem jurtyn tózbeýshilik pen jekkórýshilikke qarsy birlesip áreket etýge úndeıdi. Sondyqtan bul deklarasııany bárimiz Saýd Arabııasy men Dúnıejúzilik ıslam lıgasynyń jahandyq beıbitshilikti nyǵaıtýǵa qosqan úlken úlesi dep qabyldaımyz», dedi Álemdik jáne dástúrli dinder kóshbasshylary sezi Hatshylyǵynyń basshysy.
Sonymen qatar M.Áshimbaev dóńgelek ústelde kóterilgen máselelerdiń ózektiligine erekshe nazar aýdaryp, álemde áleýmettik-ekonomıkalyq problemalar da ýshyǵa túskenin atap ótti. Sondaı-aq qalyptasqan rýhanı daǵdarys jáne tabıǵat pen qoǵamǵa tutynýshylyq kózqaras ta adamzatqa óz saldaryn tıgizetini sóz boldy. Mundaı jaǵdaıda jahandyq dıalogti damytýdyń jáne ózara senimdi nyǵaıtýdyń jańa tásilderine degen qajettilik arta túsetini anyq.
«Qazaqstan Prezıdenti Qasym-Jomart Toqaev halyqaralyq qaýipsizdiktiń berik júıesin qalyptastyrý máselelerine únemi basa mán berip keledi. Osy maqsatpen Prezıdent beıbitshilikke shaqyratyn jańa jahandyq qozǵalys qurý týraly bastama kóterdi. Bul úderiste din kóshbasshylary aıryqsha ról atqara alady. Bıyl qyrkúıek aıynda Astanada «Dinder dıalogi: bolashaq jolyndaǵy sınergııa» taqyrybyna arnalǵan VIII sezd ótedi. Qazir dinı, saıası jáne qoǵamdyq kóshbasshylardyń birlesken áreketteri asa mańyzdy. Sondaı-aq sezd aıasynda Birikken Ulttar Uıymy О́rkenıetter alıansymen birlesip, dinı nysandardy qorǵaý jónindegi arnaıy sessııa uıymdastyrylady. Osy oraıda sezd ben Dúnıejúzilik ıslam lıgasynyń qyzmetindegi negizgi basymdyqtar uqsas ekenin atap ótken jón. Biz aldaǵy ýaqytta osy jolda Lıgamen jan-jaqty yntymaqtastyqty odan ári nyǵaıtýǵa múddelimiz», dedi M.Áshimbaev.
Dóńgelek ústeldiń qorytyndysy boıynsha Dúnıejúzilik ıslam lıgasy men Qazaqstanda ornalasqan Halyqaralyq konfessııaaralyq jáne dinaralyq dıalog ortalyǵy arasynda ózara túsinistik týraly memorandýmǵa qol qoıyldy. Aıta keteıik, dóńgelek ústelge Saýd Arabııasynyń memlekettik organdarynyń, akademııalyq toptardyń, azamattyq qoǵamnyń jáne buqaralyq aqparat quraldarynyń ókilderi de qatysty.
Sonymen qatar bul kúni Máýlen Áshimbaev Dúnıejúzilik ıslam lıgasy Bas hatshysynyń orynbasary Abdýlrahman ben Abdýlla Ál-Zaıdpen kezdesti. Onda taraptar qazirgi syn-qaterlerge nazar aýdaryp, olardy eńserý joldaryn talqylady. Sondaı-aq olar túrli baǵyttarda ózara yntymaqtastyqty odan ári nyǵaıtý jóninde pikir almasty.
О́z tarapynan Dúnıejúzilik ıslam lıgasy bas hatshysynyń orynbasary Qazaqstannyń jahandyq dinaralyq dıalogti damytýǵa arnalǵan bastamalaryn joǵary baǵalady jáne birlesken jobalardy iske asyrý baǵytyndaǵy jumysty ári qaraı jalǵastyrýǵa múddeli ekenin jetkizdi. Atap aıtqanda, Astanada Muhammed paıǵambardyń ómirbaıanyna arnalǵan halyqaralyq kórme uıymdastyrý jáne Islam órkenıeti murajaıyn salý jónindegi máseleler sóz boldy.
