PETROPAVL. 5 mamyr. Soltústik Qazaqstan oblysy Jambyl aýdandyq orman sharýashylyǵynyń ormanshysy «tilsiz jaýmen» arpalysyp júrip, mert boldy. Bul týraly tabıǵat resýrstary jáne tabıǵatty paıdalanýdy retteý basqarmasynyń basshylyǵy habarlady.
42 jastaǵy Ǵabıt Aınatýov Blagoveshenka aýylynan árárek jerde aspanǵa tik shanshyla kóterilgen qoıý tútindi baıqaı salysymen jeke menshik traktoryna ot aldyrǵan kúıi jedeldetip attanady. О́rttiń qyzyl tilin sýmańdatyp, ormandy alqapqa qaraı jaıylyp bara jatqanyn kórip, áriptesi S. Qusaıynovqa telefon soǵyp, tıisti oryndarǵa habarlaýdy ótinedi. О́zi bolsa, qosymsha kúshtiń kelýin kútpesten qyp-qyzyl ottyń jolyn bógep, aýyzdyqtaýǵa bilek sybana kirisip ketedi. Jedel brıgada jarty saǵattyń ishinde jetkenimen, traktor janynan asyl azamattyń óli múrdesin keziktiredi. Sirá, tútinge tunshyǵyp, esinen tanyp qalsa kerek.
«Búginde qazanyń sebep-saldarlaryn anyqtaý maqsatymen tergeý amaldary júrgizilýde. 3 mamyr kúni marqumnyń denesi qara jer qoınyna berildi. Artynda kámeletke tolmaǵan úsh balasy qaldy», deıdi basqarma basshysynyń orynbasary Anatolıı Ýsolsev.
О́mir Esqalı.
Derek, sýret: Soltústik Qazaqstan oblystyq tabıǵat resýrstary jáne tabıǵatty paıdalanýdy retteý basqarmasy.
