Máýlen Áshimbaev saltanatty kezdesýge qatysýshylarǵa iltıpat bildirip, el azamattary úshin Jeńis kúni erekshe mánge ıe ekenin atap ótti. Elimiz Jeńiske aıtarlyqtaı úles qosqan negizgi ındýstrııalyq jáne gýmanıtarlyq ortalyqtardyń biri boldy. Maıdanǵa attanǵan 1 mln 200 myń qazaq azamatynyń jartysynan kóbi elge oralǵan joq. Sondaı-aq 500-den asa otandasymyzdyń Keńes Odaǵynyń Batyry atanǵany aıtyldy.
– Prezıdent Qasym-Jomart Toqaev: «Biz ultymyzdyń qaharman ul-qyzdarynyń arqasynda alańsyz eńbek etip, urpaq ósirip, jarqyn bolashaqqa qadam basyp kelemiz. Sol úshin olarǵa máńgi qaryzdarmyz. Eshkim de eshqashan umytylmaıdy!» dep naqty atap ótti. Memleket basshysynyń bastamasymen byltyr «Aıbyn» ordeniniń dárejelerine aty ańyzǵa aınalǵan batyrlar Saǵadat Nurmaǵambetov, Baýyrjan Momyshuly jáne Rahymjan Qoshqarbaevtyń esimderi berildi. Bıyl 7 mamyrda Astanada Jeńistiń 80 jyldyǵy men Otan qorǵaýshylar kúnine arnalǵan áskerı sherý ótedi. Búkil el boıynsha Uly Jeńis kúnin atap ótýge qatysty belsendi jumys júrgizilip jatyr. Olardyń qatarynda konferensııalar men kórmeler, konsertter men áskerı-patrıottyq aksııalar, sporttyq jarystar men ǵylymı-aǵartýshylyq jobalar bar. Eldi mekenderge, kóshelerge, mektepterge ardagerlerdiń esimderi berilip jatyr. Jeńistiń 80 jyldyǵyna oraı qoldaý sharalaryna qosymsha árbir ardagerge 5 mln teńgeden birjolǵy tólem beriledi. Bul – TMD elderi arasyndaǵy eń joǵary kórsetkishterdiń biri. Munyń bári tarıhty dáripteýge jáne elimizdegi urpaqtar sabaqtastyǵyn saqtaýǵa degen umtylysymyzdyń jarqyn kórinisi, – dedi Senat spıkeri.
Sondaı-aq Máýlen Áshimbaev ardagerlerge qurmet kórsetý, halyqaralyq forýmdar men ǵylymı konferensııalar jáne Jeńistiń 80 jyldyǵy aıasynda túrli memleketterde ótip jatqan patrıottyq aksııalar ortaq tarıhty dáripteýge qosylǵan úles jáne urpaqtar sabaqtastyǵynyń negizi ekenin aıtty.
– Saǵadat Nurmaǵambetov, Talǵat Bıgeldınov, Qasym Qaısenov, Mánshúk Mámetova, Álııa Moldaǵulova, Hıýaz Dospanova jáne qazaq halqynyń myńdaǵan ul-qyzdarynyń esimderi bizdiń ortaq tarıhymyzǵa máńgilikke jazyldy. Almatyda qurylǵan, aty ańyzǵa aınalǵan 316-dıvızııa jaýyngerlik dańq shejiresinde aıryqsha oryn alady. General Ivan Panfılovtyń basshylyǵymen dıvızııa jaýyngerleri Máskeý úshin shaıqasta erliktiń ozyq úlgisin kórsetti. Panfılovshy batyrlar tabandylyq pen qaısarlyqtyń sımvolyna aınaldy. Dıvızııa qatarynda belgili áskerı taktık, Keńes Odaǵynyń batyry Baýyrjan Momyshuly da shaıqasty. Leıtenant Rahymjan Qoshqarbaev Reıhstagqa alǵashqylardyń biri bolyp jeńis týyn tikti, – dep M.Áshimbaev qazaq halqynyń Jeńiske qosqan úlesin erekshe atap ótti.
Sonymen qatar ol TMD PAA Keńesiniń jumysyna jáne Assambleıanyń plenarlyq otyrysyna qatysty. Odan bólek, Parlament depýtattary negizgi salalarǵa qatysty jáne ózara múddeni bildiretin modeldi zańdar toptamasyn qarady. Bul normalar aldaǵy ýaqytta zań shyǵarý qyzmetinde paıdalanýǵa usynylady.
Otyrys alańynda Senat tóraǵasy parlamenttik delegasııalardyń basshylarymen mańyzdy ekijaqty kezdesýler ótkizdi.
Sondaı-aq TMD PAA parlamenttik delegasııalarynyń basshylary men músheleri soǵysqa qatysqan jaýyngerlerdi eske alýǵa arnalǵan memorıalǵa gúl shoqtaryn qoıdy.
