Foto: Ashyq derekkóz
Jańa JI-agenttiń basty maqsaty – gazǵa qosylýǵa arnalǵan ótinimderdi durys toltyrýǵa járdemdesý. Vıse-mınıstrdiń aıtýynsha, qoldanystaǵy júıede ótinim berýshiler tarapynan jıi qatelikter jiberilip, tehnıkalyq sharttardy alý uzaqqa sozylyp jatady. JI kómegimen mundaı olqylyqtar barynsha azaıyp, qateler sany qazirgi 30 paıyzdan nebári 5 paıyzǵa deıin tómendeıdi dep kútiledi. Bul rette tehnıkalyq sharttardy alý ýaqyty da edáýir qysqarady.
Atalǵan joba 2025–2026 jyldar aralyǵynda kezeń-kezeńimen iske asyrylady. Joba iske qosylǵannan keıin, ol elimiz boıynsha 2,3 mıllıonnan astam adamdy qamtyp, gaz ınfraqurylymyna qosylýdy anaǵurlym jeńil ári qoljetimdi etedi.
Búginde gaz salasynda 74 túrli memlekettik qyzmet tolyq sıfrlandyrylǵan. Bul azamattar men bıznes ókilderiniń ýaqytyn únemdep, bıýrokratııalyq kedergilerdi azaıtady.
Sonymen qatar, «Astana Hub» tehnoparki aıasynda gaz salasyn jańǵyrtýǵa baǵyttalǵan 14 ınnovasııalyq joba iske asyrylyp jatyr. Olardyń qatarynda:
- Jasandy ıntellektpen jabdyqtalǵan vırtýaldy ken orny trenajerleri;
- Kompressorlyq qondyrǵylardy baqylaý júıeleri;
- Sıfrlyq egizder tehnologııasy;
- Inspeksııaǵa arnalǵan drondar jáne bıznes-prosesterdi avtomattandyrýǵa arnalǵan platformalar bar.
Aıta keteıik, 2024 jyldyń ózinde bul jobalar 1,2 mıllıard teńge tabys ákelse, jalpy bastalǵannan beri 3,8 mıllıard teńgeden astam kiris túsirgen. Sonymen birge, 100-ge jýyq jańa jumys orny ashylyp, salanyń sıfrlyq transformasııasy qarqyn alyp jatyr.
