Depýtat Nursultan Baıtilesov óz sózinde zań jobasynyń mańyzdylyǵyn atap ótip, zııatkerlik menshikti qorǵaý el ekonomıkasynyń damýyna tikeleı áser etetinin jetkizdi.
«Zııatkerlik menshik ınnovasııalyq ekonomıkany damytýda, ınvestısııa tartýda jáne eldiń básekege qabilettiligin arttyrýda sheshýshi ról atqaratyny belgili.Bul quqyqty zańsyz paıdalaný jáne buzý elimizdiń ekonomıkasy men mádenıetine eleýli qaýip tóndiredi, ınnovasııaǵa degen yntany azaıtyp, quqyq ıelerine zııan keltiredi», dedi depýtat.
Sonymen qatar depýtat Memleket basshysy Qasym-Jomart Toqaevtyń Joldaýynda aıtylǵan kreatıvti ekonomıkany damytý tapsyrmasyna nazar aýdardy.
«Memleket Basshysy Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda elimizde kreatıvti ekonomıkanyń aýqymdy damýyna barlyq jaǵdaı jasalý qajettiligine nazar aýdardy. Onyń ishinde zııatkerlik menshikti quqyqtyq tásildermen qorǵaý túbegeıli mańyzdy másele ekenin atap ótti», dedi N.Baıtilesov.
Zań jobasy qoldanystaǵy zańnamany júıeli túrde jetildirýge baǵyttalǵan. Májilis depýtattary zań erejelerin jetildirý úshin jumys toby otyrystarynda birqatar túzetýler usynǵan. О́zgerister zııatkerlik menshik salasyndaǵy qoǵamdyq qatynastardy, onyń ishinde taýarlar men qyzmetterge qatysty quqyqtardy retteýdi kózdeıdi.
Depýtat Nursultan Baıtilesov Meta platformalarynda qazaqstandyq mýzykalyq týyndylarǵa shekteý qoıylǵan jaǵdaıdy da atap ótti. Bul oqıǵa ujymdyq basqarý salasyndaǵy reformalardy qajet etetinin kórsetken.
«2024 jylǵy qarashada Meta platformalarynda qazaqstandyq avtorlar men oryndaýshylardyń mýzykalyq týyndylaryna shekteý faktileri ujymdyq basqarý (MQUNB) jónindegi uıymdardy baqylaýdy jetildirý qajettigin kórsetti. Bul jaǵdaı quqyq ıeleriniń derekterin sıfrlandyrýdy talap etti», dedi ol.
Osyǵan baılanysty zań jobasynda ujymdyq basqarý uıymdarynyń jumysyn sıfrlandyrý, syıaqynyń ashyqtyǵyn qamtamasyz etý jáne ony ádil bólýge baǵyttalǵan ózgerister engiziledi.
«Bul túzetýlerdiń maqsaty avtordyń jáne quqyq ıelenýshiniń ujymdyq basqarý júıesi arqyly óz obektilerin paıdalanǵany jáne retranslıasııa jasaǵany úshin syıaqy alý quqyǵyn qamtamasyz etý», dedi N.Baıtilesov.
Sonymen qatar, zań jobasy patenttik senim bildirilgen ókilderdiń mamandanýyn kózdeıdi. Sondaı-aq taýar tańbalaryn tirkeýden bas tartý negizderi men patent berýden bas tartý múmkindigi naqtylanbaq.
Zań jobasy boıynsha turaqty komıtetter oń qorytyndylaryn bergen. Qujat ýákiletti memlekettik organdar, bıznes ókilderi, avtorlar men sarapshylar qatysqan jumys toptarynda jan-jaqty talqylanǵan.
«Joǵaryda aıtylǵandardy eskere otyryp, Komıtet osy zań jobasyn birinshi oqylymda maquldaýdy usynady. Qoldaýlaryńyzdy suraımyn», dep sózin túıindedi depýtat.
