JAŃA OQÝ ORNY JASTARDY QANATTANDYRADY

Keshe Aqordada Qazaqstan Respýblıkasynyń Memlekettik hatshysy – Syrtqy ister mınıstri Qanat Saýdabaevtyń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekten tys májilisi bolyp ótti, dep habarlady Qazaqstan Respýblıkasy Prezıdentiniń baspasóz qyzmeti. “Búgin Astanada Qazaqstan Respýblıkasynyń Tuń­ǵysh Prezıdenti Nursultan Ábishuly Nazarbaev atyndaǵy Halyqaralyq ýnıversıtetiniń – Nazarbaev Ýnıversıtetiniń resmı ashylýy boldy. Álemdegi úzdik ýnıversıtetterdiń baǵdarlamalary boıynsha jumys isteıtin jáne elimizge qajetti ári zamanaýı maman­dardy daıarlaıtyn elordamyzda osyndaı joǵary oqý ornynyń ashylýy – Elbasynyń elimizdegi oqý júıe­siniń sapasyn kóterý, sondaı-aq jas memleketimizdiń bolashaǵyna naqty qamqorlyǵynyń  aıǵaǵy. Jańa ýnıversıtet jas qazaqstandyqtarǵa joǵary bilim berip, sonymen qatar onyń dıplomynyń halyqaralyq bilim júıesinde tanylýy men keń qoldanysyn qamtamasyz etedi. Jańa ýnıversıtet Astanany tanylǵan halyq­aralyq bilim jáne ǵylym ortalyǵyna aınaldyryp, Qazaqstannyń básekege qabilettiligin kóteretinine men kámil senemin”, – dedi Qanat Saýdabaev. Nazarbaev Ýnıversıtetinde bolatyn mamandyqtardyń keń aýqymyn eskere otyryp jáne qarjyny elimizdiń oqý júıesine joldaý maqsatynda, biz “Bolashaq” prezıdenttik baǵdarlamasynda qazirgi ýaqytta belgilengen uqsas mamandyqtardy qysqartý jónindegi máseleni qaraýǵa tıispiz. Endi atalǵan mamandyqtar boıynsha úmitkerler Nazarbaev Ýnıversıtetine oqýǵa jiberiledi”, – dep atap ótti Memlekettik hatshy – Syrtqy ister mınıstri. Komıssııa otyrysynyń qorytyndysy boıynsha 2010 jylǵy “Bolashaq” halyqaralyq stıpendııasynyń Basym mamandyqtar tizbesine tıisti ózgertýler engizildi.