Basqarma basshysynyń málimetinshe, búgingi tańda oblysqa 2,2 mıllıon doza bıopreparat jetkizilgen. Bul jalpy kólemniń 46%-yn quraıdy. О́ńirde aldyn alý maqsatynda jalpy sany 539 myńnan astam veterınarııalyq is-sharalar atqaryldy. Atap aıtqanda, iri qara malǵa sibir jarasy, aýsyl jáne basqa da juqpaly aýrýlarǵa qarsy ekpeler egildi. Sonymen qatar, ıtter arasynda qutyrma, al jyrtqysh janýarlar arasynda ehınokokkoz aýrýynyń aldyn alý jumystary júrgizilip jatyr.
– Veterınarııalyq qyzmet – azyq-túlik qaýipsizdiginiń negizi. Tórt túliktiń saýlyǵy et, sút jáne basqa da ónimderdiń sapasyna tikeleı áser etedi. О́ńirde jalpy 11 kommýnaldyq memlekettik kásiporyn jumys isteıdi. Olar 99 veterınarlyq pýnkti biriktiredi. Bul pýnktterde 475 maman eńbek etip júr. Aǵymdaǵy jyldyń birinshi toqsanynda olar 60 myńnan astam memlekettik qyzmet kórsetti. Barlyq qujat aınalymy «EASÝ», «ISJ» aqparattyq júıeleri men «VET-MOBILE» mobıldik qosymshasy arqyly elektrondyq formatta júzege asyrylady, – deıdi basqarma basshysy Ertaı Batholdın.
Budan bólek, óńirde aýyl sharýashylyǵy janýarlaryn sáıkestendirý jumystary da jalǵasyp jatyr. Búgingi tańda jyldyq jospardyń 20,8%-y oryndalyp, 100 myńnan astam janýar tirkeýden ótti. Bul sharalar mal basyn jáne barlyq veterınarlyq rásimderdi tıimdi baqylaýǵa múmkindik beredi.
Shyǵys Qazaqstan oblysy
