Joba 2019 jyly Prezıdent Qasym-Jomart Toqaevtyń tapsyrmasymen qolǵa alynǵan. Ǵımaratqa qarap kópjyldyq eńbektiń, zamanaýı ınjenerlik, medısınalyq sheshimderdiń sátti úlgisin baıqaý qıyn emes. Nysannyń jalpy aýmaǵy – 60 myń sharshy metr. 210 tósek-orynǵa shaqtalǵan. Budan bólek ortalyqtyń emhanasynda kúnine 500 naýqasty emin-erkin qabyldaýǵa múmkindik bar. Ortalyqqa medısınalyq jabdyqtardy Varian Medical Systems Inc., Philips, Siemens syndy álemniń jetekshi óndirýshileri jetkizgen. Osylaısha, Ortalyq Azııada alǵash ret sáýlelik, radıonýklıdtik jáne protondyq terapııany biriktiretin birtutas platforma qurylyp otyr.
Osy kúni ortalyqtyń ashylý saltanatyna oraı «Qazaqstan Respýblıkasyndaǵy onkologııalyq kómektiń jańa belesteri. UǴOO – bolashaqtyń ozyq tehnologııalary» taqyrybynda halyqaralyq ǵylymı-tájirıbelik konferensııa ótti. Oǵan 29 elden jetekshi onkologtar, zertteýshiler men salanyń bilikti mamandary keldi. Onkologııalyq aýrýlardy dıagnostıkalaý, emdeý jáne aldyn alý baǵyttaryndaǵy zamanaýı tásilderdi talqylady. Konferensııada Prezıdent kómekshisi Tamara Dúısenova onkologııalyq aýrýlardy emdeýge el dárigerleri ǵana emes, halyqaralyq qoǵamdastyq qulshynyp otyrǵanyn alǵa tartty.
–Onkologııalyq aýrýlar densaýlyq saqtaý salasynyń basymdyq beretin baǵyttarynyń bir bolyp qala beredi. Sebebi bul bir óńirdi, bir memleketti ǵana emes, dúnıejúzi halyqtaryn alańdatyp otyrǵan másele. Áriptesterden suratqan apqaratty mysal etsem, dúnıejúzinde jylyna 19 mıllıonnan astam qaterli isik jaǵdaıy tirkeledi eken. Onyń ishinde 10 mıllıonnan astam adam qaza tabady. Al elimizde 40 myńǵa jýyq pasıentten qaterili isik anyqtalǵan. Qarap otyrsaq, bir monoqalanyń halqy. Onyń ishinde 12 myńnan astam adam qaza tabady eken. Muny da salystyrmaly túrde bir aýyldyń halqy dep aıtsaq bolady. Osyny eskersek, álem halyqtary onkologııalyq aýrýlardyń profılaktıkasyn, dıagnostıkasyn jetildirip, aýrýdy emdep-jazý boıynsha tájirıbe almasyp otyrýy kerek degenge toqtalamyz. Búgingi konferensııanyń ózi saladaǵy úzdik tájirıbelerdi, jańashyldyq pen múmkindikterdi talqylaýdyń taptyrmas múmkindigi dep bilemiz, – dedi Tamara Dúısenova.
Bıologııa ǵylymdarynyń doktory, professor, akademık Kúnsulý Zakarııa onkologııalyq aýrýlardy emdeýdi túptamyrynan, profıkatıka, dıagnostıkadan bastaý keregin aıtty.
–Onkologııalyq ortalyq – qarapaıym medısınalyq mekeme emes, bul elimizdiń densaýlyq saqtaý salasymen qatar ǵylymnyń damýyna jol ashatyn ortalyq. Jańa ǵımarattyń paıdalanýǵa berilýi kópjyldyq eńbektiń, saladaǵy dárigerler jetistiginiń nátıjesi dep bilemiz. Biz qazir onkologııalyq aýrýlar kúrdelenip bara jatqan kezeńde ómir súrip jatyrmyz. Osyny eskersek, aýrýdy emdeýge kelgende profılaktıka, dıagnostıkaǵa ǵylymı dáleldengen qadammen barý kerek. Biz búgin onkologııalyq aýrýdy emdep qana qoımaı, onkologııadaǵy ǵylymdy tereń zerttep, túsinýimiz kerek. Jańa ortalyqtyń mıssııasy da joǵary ǵylymdy, ınnovasııa men ozyq tájirıbelerdi qaterli isikpen kúreste qoldanýǵa baǵyttalady. Munda elimizdiń eń úzdik degen mamandary jumys isteıdi. Aýrýdy dıagnostıkalaý men emdeýdiń jańa tásilderi engiziledi. Bastysy, osy ortalyqta pasıentterdiń, olardyń otbasy músheleriniń mazdap turǵan úmiti janady,– deıdi Kúnsulý Zakarııa.
Ortalyqtaǵy negizgi tehnologııalar qatarynda Varian ProBeam negizindegi protondyq terapııa, PET/KT, PET/MRT syndy qaterli isikti emdeıtin, dıagnostıka jasaýda taptyrmaıtyn sońǵy úlgidegi ozyq quraldar bar. Jańa ǵımaratta halyqaralyq qaýipsizdik standarttaryna saı aýa tazartý jáne radıoaktıvti qaldyqtardy joıý júıelerimen jabdyqtalǵan 8 mamandandyrylǵan palatasy bar radıonýklıdti terapııa bólimi bolady. Sonymen qatar radıofarmasevtıkalyq preparattardy óndirýge arnalǵan sıklotrondyq-óndiristik keshen iske qosylǵan. Jospar boıynsha 11 túrli preparat shyǵarylsa, onyń jeteýi elimizde alǵash ret sıntezdeledi. Osy ıgilikterden keıin ozyq ınfraqurylymy bar Ulttyq ǵylymı onkologııa ortalyǵy Ortalyq Azııadaǵy jetekshi klınıkalyq, ǵylymı jáne akademııalyq ortalyqqa aınalýdy maqsat etip otyr.
