Salmaǵy 3844 g, boıy 46 sm bolyp týǵan náresteni emhananyń neonatologııalyq brıgadasy kesar tiliginen keıin birden jasandy tynys alý apparatyna qosyp, Almaty qalasynyń Balalarǵa jedel medısınalyq kómek kórsetý ortalyǵyna jetkizdi.
Bala aýrýhanaǵa óte aýyr jaǵdaıda kelip túskendikten, jaǵdaıy birden baqylaýǵa alynyp, shuǵyl kómekti talap etti. Ýltradybystyq zertteý derekteri boıynsha, qursaqishilik kezeńde ólshemi 12 sm-ge jýyq túzilis bar degen dıagnoz qoıylǵan. Bul bosaný barysynda erekshe akýsherlik jáne hırýrgııalyq tásildi qajet degen sóz.
Sonymen 24 naýryzda balalar jedel járdem bóliminiń dárigerleri isik tárizdi túziliske pýnksııa jasap, 500 ml-den astam suıyqtyqty alyp tastady. Bul náresteniń tunshyǵý qaýpin azaıtýǵa kómektesti. Balanyń jaǵdaıyn bólim meńgerýshisi Ulyqpan Bolatbekuly Álseıitov baqylaýǵa aldy. Sábıdi Balalarǵa shuǵyl medısınalyq kómek kórsetý ortalyǵynyń jańa týǵan náresteler jansaqtaý bólimine jatqyzyp, ota jasaýǵa daıyndady.
Al 26 naýryzda operasııa arqyly lımfangıoma túbegeıli alyndy. Operasııany balalar hırýrgi Myrzahmet Samatbek pen assıstent Jalǵas Kúnııazov endotrahealdi anestezııamen jasady. Neonatolog, hırýrg jáne anestezıologtardyń úılesimdi jumysynyń arqasynda ota sátti ótti.
Bala taǵy úsh apta boıy jansaqtaý bóliminde dárigerlerdiń baqylaýynda boldy. Keıin jaǵdaıy durystalǵan soń úıine shyǵaryldy.
Bul oqıǵa - Almaty qalasynyń Balalarǵa jedel medısınalyq kómek kórsetý ortalyǵynyń ujymynyń sırek kúrdeli keselmen týǵan náresteniń ómiri úshin kúrestegi kezekti jeńisi. Operasııadan keıin tigister jazylyp, ýaqyt óte kele múldem kórinbeıtin bolady.
