Astanada qyzylshaǵa qarsy ekpe jasaý naýqany ótedi

ASTANA. 12 aqpan. Astanada 16 - 28 aqpan aralyǵynda elordada 15-19 jastaǵy turǵyndar úshin qyzylshaǵa qarsy qosymsha ımmýnızasııalaý jumystary júrgiziledi. Bul týraly astana.kz habarlady. Qosymsha ımmýnızasııalaý kezinde 28 aqpanǵa deıin 31 500 adamǵa ekpe jasaý kózdelip otyr. Densaýlyq saqtaý qyzmetkerleri qalalyq emhanalar, mektepter, joǵary jáne orta bilim mekemeleri sekildi 142 ortalyqta ekpe jasaıdy. Elimizde 2012 jyldan beri qyzylshamen aýrý deńgeıi artyp keledi, al aýrýǵa shaldyǵýdyń 400 astam jaǵdaıy tirkeldi. 2014 jyly Astana qalasynda 30 naýqasta atalǵan dıagnoz rastaldy. Negizinen qyzylshamen 15-29 jastaǵy adammdar aýyrady, bul kórsetkish 46 paıyzdy qurasa, 1 jasqa deıingi balalardyń aýrý deńgeıi – 18 paıyz. Atalmysh aýrýdan qorǵanýdyń jalǵyz joly – ekpe jasaý. Qyzylsha – ótkir juqpaly vırýstyq aýrý, dene qyzýynyń kóterilýi, bórtpelerdiń shyǵýy, jótelý, bas aýrýy sekildi belgileri bar. Aýrý qarym-qatynas jasaǵan kez-kelgen adamǵa juǵady. Qyzylshamen aýyrǵan adam aınaladaǵylarǵa bórtpeler shyqqanǵa deıin 4 kún buryn, bórtpe shyqqannan keıin 4 kún boıy qaýipti bolady. Aýrý 7-18 kúnniń ishinde beleń alady. Joldybaı Bazar. Derek, sýret: astana.kz.