Japonııanyń Osaka qalasynda ótip jatqan EXPO 2025 dúnıejúzilik kórmesinde Qazaqstan pavılony 100 myńynshy qonaǵyn qarsy aldy. Bul mártebeli qonaq – Nara qalasynyń 37 jastaǵy turǵyny, Jeke qarjylyq bastamalar qaýymdastyǵynyń joba menedjeri Akıba Akıhıto.
Akıhıto myrza pavılondaǵy ekspozısııalarǵa tánti bolǵanyn aıtyp, Qazaq handyǵynyń tarıhy men zamanaýı tehnologııalardyń úılesimine erekshe nazar aýdardy. Ol «ALEM» qurylǵysyn kórip, Qazaqstannyń tereń tarıhy men bolashaqqa degen kózqarasynyń úılesimdiligin joǵary baǵalady. Sonymen qatar, Qazaqstannyń mádenıetimen jaqynyraq tanysý úshin Túrkistanǵa barǵysy keletinin bildirdi.
Qazaqstannyń Japonııadaǵy Tótenshe jáne ókiletti elshisi Erlan Baýdarbek-Qojataev Akıhıto myrzany quttyqtap, oǵan «Karavansaray Turkistan» týrıstik keshenine eki adamǵa arnalǵan sapar sertıfıkaty men estelik syılyqtar tabys etti.
Qazaqstan pavılony tórt negizgi aımaqtan turady: tarıh, mádenıet, ekonomıka jáne ınnovasııa. Pavılonnyń tujyrymdamasy shańyraq sımvolyna negizdelgen jáne 3D meppıng, ımmersıvti proeksııalyq shoý sııaqty zamanaýı tehnologııalarmen jabdyqtalǵan. Sonymen qatar, pavılonda elimizdiń ınvestısııalyq jáne ekonomıkalyq áleýeti, tabıǵı resýrstary, týrıstik jáne ınnovasııalyq múmkindikteri, «jasyl» energetıka jáne turaqty damý salasyndaǵy jetistikteri kórsetilgen.
Aıta keteıik, EXPO 2025 kórmesi 13 sáýirde bastalyp, 13 qazanǵa deıin jalǵasady. Kórmege 158 el men 9 halyqaralyq uıym qatysyp jatyr.
