Qazaq eliniń azattyǵy jolynda jankeshti qyzmet etken, ultynyń bolashaǵy úshin búkil ǵumyryn sarp etken ult zııalylarynyń biri Ǵumar Qarashtyń mereıtoıyna baılanysty is-sharalar Batys Qazaqstan oblysynda bastalyp ketti.
Osydan buryn Jánibek aýdandyq ákimdigi oblys ortalyǵynda zııaly qaýym ókilderimen, ólketanýshylarmen kezdesý ótkizip, mereıtoılyq is-sharalardyń barysyn aqyldasqan bolatyn. Oblystyq deńgeıde Ǵumar Qarash oqýlary ótip, jas órender aqyn-aǵartýshynyń shyǵarmashylyǵyna boılady. Aıta keteıik, Jánibek aýdanynyń Borsy aýylyndaǵy Ǵumar Qarash kesenesi – elimizdiń jalpyulttyq kıeli nysandary tizimine engizilgen zııarat orny. Aqyn mereıtoıyna josparlanǵan jıyndardyń bir parasy sol jerde ótedi.
Mýzeıde ashylǵan shaǵyn kórmede aqynnyń sýretteri, óz qolymen toltyrǵan anketa paraǵy, nemeresi Nádııa Qarashevanyń túzgen ata-tek shejiresi, aqyn qapııada qaza bolǵan 1921 jylǵy 12 sáýirde Ordadan Orynborǵa jiberilgen qaraly jedelhat sekildi qujattar qoıylǵan eken.
- Bul qujattardyń basym bóligin tirnektep jınaǵan – belgili jıdashy, tarıhshy Mustafa Ysmaǵulov aǵamyz edi. Ol kisi ómir boıy Bókeıliktiń tarıhyn túgendep ótti. Artynda qalǵan mol murasynyń qomaqty bóligi qazir Batys Qazaqstan oblystyq tarıhı-ólketaný mýzeıiniń qorynda saqtaýly tur, - deıdi mýzeı ardageri, Qazaqstan Respýblıkasyna eńbegi sińgen qaıratkeri Sara Tanabaeva.
Oral qalalyq kitaphanalar júıesi men H.Esenjanov atyndaǵy oblystyq balalar men jasóspirimder kitaphanasynyń qyzmetkerleri, Batys Qazaqstan ınjenerlik-tehnıkalyq ýnıversıteti, Mahambet О́temisuly atyndaǵy Batys Qazaqstan ýnıversıteti, Jahansha Dosmuhamedov atyndaǵy joǵary pedagogıkalyq koledji oqytýshylary men stýdentteri, mýzeı qyzmetkerleri qatysqan jıynda ardager ólketanýshy Tıhon Álipqalıev te tarıhı tulǵanyń ómiri men eńbegin nasıhattaý qajettigin aıtty.
Ǵumar Qarash – ult rýhanııatyna erekshe eńbegi sińgen, ultymyzdyń azattyǵy men bolashaǵy jolynda qalamymen de, isimen de kúresken tulǵa. Kórme barysynda stýdentter aqyn óleńderin jatqa oqyp, kezdesýdiń mazmunyn baıyta tústi.
Batys Qazaqstan oblysy
