Foto: primeminister.kz
Oljas Bektenov bıylǵy birinshi toqsannyń qorytyndysy boıynsha qurylys jumystarynyń kólemi 1 trln teńgeden asqanyn, bul ótken jyldyń sáıkes kezeńimen salystyrǵanda 17%-ǵa joǵary ekenin jetkizdi. Sondaı-aq 3,7 mln m 2 turǵyn úı paıdalanýǵa berildi, bul byltyrǵy kórsetkishten 7,5%-ǵa artyq.
«Elimizdiń kóptegen óńirinde qurylys jumystarynyń qarqyny arta túskeni baıqalady. Budan salanyń ornyqty damýyn kórýge bolady. Jalpy qurylys sektory elimizdiń ınfraqurylymdyq negizin qalyptastyrady. Kóptegen jumys oryndaryn qurylyp, bıznestiń damýyna jáne azamattardyń turmys sapasyna tikeleı áser etedi», dep atap ótti Premer-mınıstr.
Oljas Bektenov qurylysta sıfrlyq sheshimderdi engizý qurylys jobalaryn iske asyrý merzimderin edáýir qysqartýǵa, shyǵyndardy jáne sybaılas jemqorlyq táýekelderin barynsha azaıtýǵa múmkindik beretinin atap ótti. Búginde ınjenerlik ınfraqurylymnyń 90%-dan astamy sıfrlandyryldy. Ruqsat qujattamasyn berý jáne jobalardy kelisý boıynsha memlekettik qyzmetterdi avtomattandyrý iske qosyldy. EGov portaly arqyly qol jetkizýge bolatyn úlestik qurylystyń biryńǵaı tizilimi quryldy.
Premer-mınıstr Memleket basshysynyń tapsyrmasy boıynsha osy jyldyń sońyna deıin qurylys salasynyń qoldanystaǵy barlyq portalyn biryńǵaı platformada ıntegrasııalaıtyn, «biryńǵaı tereze» qaǵıdaty boıynsha qala qurylysyn josparlaýdan bastap nysandardy paıdalanýǵa berýge deıingi ózekti aqparattardyń barlyǵy jınaqtalatyn Biryńǵaı aqparattyq júıe iske qosylatynyn atap ótti. Osyǵan baılanysty júıeni iske qosý úshin barlyq óńir ákimdikterine osy jylǵy 1 qazanǵa deıin ınjenerlik jeliler shemalary men qala qurylysy qujattaryn sıfrlandyrýdy aıaqtaý tapsyryldy.
Sondaı-aq Premer-mınıstr jaýapty vedomstvolarǵa birqatar tapsyrma berdi. Atap aıtqanda Aýyl sharýashylyǵy, О́nerkásip jáne qurylys mınıstrlikterine, óńir ákimdikterine jáne «Azamattarǵa arnalǵan úkimet» korporasııasyna 89 qalada ınfraqurylymdyq derekterdiń biryńǵaı geoportaly arqyly ruqsat qujattamasyn berý men eskızdik jobalardy kelisýdiń pılottyq jobasy aıasynda anyqtalǵan derekterdiń sáıkessizdigin joıý mindetin júktedi.
Sıfrlyq damý, ónerkásip jáne qurylys mınıstrlikterine qurylys salasyndaǵy JI-modýlderdiń aýqymyn keńeıtý boıynsha sheshimder ázirleý tapsyryldy.
Ulttyq ekonomıka mınıstrligine múddeli memlekettik organdarmen birlesip, qala qurylysy kadastry júıesi arqyly tehnıkalyq sharttardy mindetti túrde sıfrlyq formatta berý jóninde júıeli sharalar qabyldaýdy tapsyryldy.
