Foto: Vıdeodan alynǵan kadr
Beınejazbada bir oqýshynyń birneshe qatarlasyn judyryq jáne alaqanmen beti men denesinen uryp jatqan sáti kórinis tapqan.
Basqarmanyń málimetinshe, bul jaǵdaı 2024 jyldyń qyrkúıeginde oryn alǵan. Jábir kórsetken oqýshy 2025 jyldyń naýryz aıynda basqa mektepke aýystyrylǵan.
«Beınejazbanyń eski bolǵanyna qaramastan, bul oqıǵa boıynsha arnaıy komıssııa qurylyp, tergeý jumystary júrgizilip jatyr. Tekserý nátıjesinde oqıǵaǵa qatysy bar tulǵalar men tárbıelik jumysty tıisti deńgeıde uıymdastyrmaǵan mektep qyzmetkerleriniń jaýapkershiligi qaralady», delingen habarlamada.
Sonymen qatar, mektep oqýshylaryna psıhologııalyq jáne pedagogıkalyq qoldaý kórsetilip, ata-analarymen túsindirý jumystary júrgizilgeni habarlandy.
Almaty oblystyq polısııa departamentiniń habarlaýynsha, bul jaǵdaı boıynsha kámeletke tolmaǵandarǵa dene jaraqatyn salý faktisi boıynsha qylmystyq is tirkelgen.
«Balalardy tárbıeleý boıynsha mindetterin durys oryndamaǵany úshin quqyq buzýshy jasóspirimniń jáne beınejazba túsirgen oqýshynyń zańdy ókilderi ákimshilik jaýapkershilikke tartyldy», delingen habarlamada.
