Sýretti túsirgen – avtor
Jas talanttardan turatyn «Giovani Talenti» kameralyq orkestriniń repertýaryndaǵy «Qazaqstan kompozıtorlarynyń shyǵarmalary» jınaǵyn ónertanýshylar jyly qabyldady. Joba Mádenıet jáne aqparat mınıstrliginiń qoldaýymen júzege asyrylǵan «Táýelsizdik urpaqtary» memlekettik granty aıasynda jaryq kórip otyr.
Jınaqqa engen týyndylar — ónerge óz órnegimen kelgen talantty jas kompozıtorlardyń kameralyq orkestrge arnalǵan shyǵarmalaryn qamtyǵan. Joba avtorlary jınaqty shyǵarýdaǵy maqsat daryndy mýzykanttarǵa qoljetimdi, ári sapaly ulttyq repertýar usyný bolǵanyn aıtady. О́nertanýshylardyń sózinshe, jınaq bolashaq ónerpazdardyń kásibı damýyna, ulttyq mýzykany tereń tanýyna yqpal etpek.
Keshte «Giovani Talenti» orkestri Ahmet Jubanov atyndaǵy mýzykalyq mekteptiń 25 shákirti óner kórsetti. Olar Bah, Chaıkovskıı, Grıg sııaqty klassıkterdiń týyndylaryn, sondaı-aq otandyq kompozıtorlardyń premeralyq shyǵarmalaryn oryndap, kórermen yqylasyna bólendi.
Sheberlik pen shabyt toǵysqan orkestrge halyqaralyq deńgeıdegi dırıjer, Qurmanǵazy atyndaǵy Qazaq ulttyq konservatorııasynyń túlegi, «Táýelsizdik urpaqtary» grantynyń jeńimpazy Arshat Shárip jetekshilik etti. Kesh shymyldyǵyn P.I.Chaıkovskıı atyndaǵy Máskeý memlekettik konservatorııasynyń túlekteri — Karına Izmaılova men Abylaı Nurlybek ashyp, olardyń kásibı oryndaý sheberligi men sahna mádenıeti kórermenderge rýhanı demalys syılady. Is-shara elimizdegi akademııalyq mýzyka mektebiniń negizin qalaýshy, ult mádenıetiniń alyby Ahmet Jubanovtyń týǵan kúnine oraı uıymdastyrylyp otyr.
«Uly ustazdyń óner murasyn ulyqtaý — búgingi urpaqtyń paryzy. Mýzyka tili adamzat balasyn bir-birine jaqyndastyratyn qudiret. О́nerde shekara bolmaıtyny sondyqtan. Halqymyzdyń rýhanı baı mádenıeti ulttyq mýzykamyzdyń ózeginde jatyr. Ony zamanǵa saı túrlendirý, ári qaraı damytý – jas kompozıtorlarǵa júkteletin jaýapty mindet. Jobaǵa qoldaý kórsetken jandarǵa alǵys aıtamyz», deıdi «Mádenıet» baǵyty boıynsha «Táýelsizdik urpaqtary» memlekettik grantynyń jeńimpazy Arshat Shárip.
Aıtýly kesh Qurmanǵazy atyndaǵy qazaq ulttyq konservatorııasy usynǵan «Dáýirler úndestigi» kórmesine ulasty. Kórme ult aspaptaryn oryndaý men zerttep-zerdeleýdi bıik beleske kótergen elimizdiń kompozıtorlyq mektebin qalyptastyrýshy, alǵashqy kásibı mýzykatanýshy Ahmet Jubanovtyń ómir tynysy men shyǵarmashylyq murasynan syr shertedi. 1945 jyly A.Jubanovtyń basshylyǵymen konservatorııada Halyq aspaptary kafedrasy qurylyp, kafedra 1980 jyly Halyq aspaptary fakýlteti retinde aıasyn keńeıtken bolatyn. Ultymyzdyń kásibı aýyzsha oryndaýshylyq dástúrlerin jandandyrý maqsatymen fakýltet janynan 1987 jyly ashylǵan «Halyq áni» kafedrasy da óner keńistiginde qanshama talanttardy qanattandyrǵan kıeli shańyraq.
ALMATY
