Foto: egemen.kz/ Erlan Omar
Dılfýza Baıraqtarova – Qyzylorda oblysy, Qarmaqshy aýdany, III Internosıonal aýylynyń turǵyny, túrik etnosynyń ókili
Aýylymyz Qazaqstannyń kishkentaı modeli ispetti. О́ıtkeni aýylymyzda 11 etnos ókilderi birge turamyz. Bir-birimizdiń salt-dástúr, tilimiz ben dinimizdi jaqsy bilemiz, syılasamyz. Sol salt-dástúr, mádenıetimiz arqyly bir-birimizben tyǵyz baılanystamyz. Osy qundylyqtardy tereń túsingen saıyn qarym-qatynasymyz da tereńdeı túsedi. Elimizdiń baǵa jetpes baılyǵy - halyqtar arasyndaǵy dostyq. Tatýlyqtyń besigi dep aıtýǵa da bolady. О́ıtkeni árbir ultqa óziniń salt-dástúri men mádenıetin, jańǵyrtýǵa, óziniń ana tilin, dinin zertteýge, bilýge, nasıhattaýǵa barlyq jaǵdaı jasalǵan. Mol múmkindik berilgen. Qazaqstan ultaralyq turaqtylyq pen kelisimniń ortalyǵy. Sózimizge ár oblys ortalyǵynda ornalasqan Dostyq úıleri dálel. Bıyl elimizde Assambleıanyń 30 jyldyǵy toılanyp jatyr. Assambleıanyń basty róli kóp ultty elimizde beıbitshilik pen kelisimdi qoldaý. Biz elimizdegi dostyqty joǵary baǵalaımyz. Qazaqstan halqy Assambleıasynyń álemde analogy joq. Biz osyny maqtan tutamyz. Birtutas halyq ortaq Otan taǵdyryna jaýapty ekenimizdi sezdiredi.
Dılnoza Tadjımetova – Túrkistan oblysy, Báıdibek aýdanynyń turǵyny, ózbek etnosynyń ókili
Qazaqstan - kóptegen ulttar men ulystardyń ortaq shańyraǵy. Elimizdegi halyqtar dostyǵynyń basty qundylyqtary - birlik pen tatýlyq, ózara syılastyq pen ortaq múdde úshin yntymaqtasa eńbek etý. Ár ult óz dástúri men mádenıetin saqtaı otyryp, bir-birin qurmetteıdi, bul - bizdiń basty baılyǵymyz.
Men ózbek ultynyń ókili bolsam da, qazaq mádenıetin úlken qurmetpen qabyldaımyn. О́z ultymnyń salt-dástúrin umytpaı, qazaq halqynyń tili men mádenıetin de qasterleımin. Osylaısha eki mádenıetti úılestire otyryp, elimniń damýyna óz úlesimdi qosýǵa tyrysamyn. Qazaq mádenıetin meńgerýdi dombyra úırenýden bastadym. Osy talpynysymnyń arqasynda qazaq halqynyń ulttyq erekshelikteri men rýhanı murasyn boıyma sińirdim. О́nerim órge súırep, qazir baıqaýlarda baq synap, júldeli oryndarǵa qol jetkizip júrmin. Sondyqtan turyp jatqan elińniń mádenıetin meńgerý jańa múmkindikteri jol ashady.
Veronıka Kım – Túrkistan oblysy, Shardara aýdany, Qosseıit aýylynyń turǵyny, káris etnosynyń ókili
Tarıh tamyryna kóz salsaq, qazaq halqy túrli saıası saldarmen Qazaqstanǵa taban tiregen halyqtardy ystyq yqylas, keń qushaqpen qarsy aldy. Osy qundy qadam arqyly ózge etnos ókilderine jańa jerde tirshiligin túletýge múmkindik syılasa, ekinshiden berik dostyqtyń negizi sol syn shaqtarda qalandy. О́z kezeginde túrli taǵdyrmen Qazaqstanǵa qonys tepkender san saladaǵy bar bilgen, túıgen tájirıbesin búgip qalmady. Máselen meniń atam, ákem «kúrish savhozynda» eńbek etti. Sý qoımalaryn salýǵa úles qosty. Týǵan jerimizdeı bolyp ketken Qazaqstan barshaǵa teń quqyq pen jumys isteý úshin birdeı múmkindik syılap otyr. Bul biz úshin basty qundylyqtyń biri. Memleketimizdegi bar azamattyń armanyn oryndaýǵa jaǵdaı jasap otyrǵan memlekettik saıasatty árdaıym qoldaımyz. Biz de tatýlyǵy jarasqan jerimizdiń jetistigin kóbeıtý jolynda ter tógýden jalyqpaımyz.
Vladıslav Gorızanov - Astana qalasynyń turǵyny, orys etnosynyń ókili
Qazaqstanda 130-dan astam etnos ókilderi turady. Bul ózge etnos pen qazaq halqy úshin úlken jaýapkershilik. Birlik merekesi qarsańynda qos tarap jaýapkershilik júgin teń arqalap kele jatqanyn aıtqym keledi. Bul sózime byltyr elimizdiń batys, soltústigin sý basqanda qazaq halqymen teń kómekke umtylǵan Assambleıa músheleriniń áreketi jarqyn mysal. Halyqtardyń ortaq maqsatqa jumyldyrǵan osy judyryqtaı jumylý, yntymaqqa umtylý. Kóptegen etnostyń terezesi teń turmys keshýi memlekettik qoldaýdyń arqasy dep bilemin.
Áńgime aýanynan baıqaǵanymyzdaı elimizdegi etnos ókilderi men qazaq halqyn bir arman men múddege jumyldyryp turǵan - birlik kúshi. Sondyqtan birligi myǵym memleketimizdiń qorǵany buzylmasy sózsiz.
