Almatyda máslıhattyń kezekten tys XXIX sessııasy barysynda depýtattar úı janýarlaryn kútip-baǵý men serýendetýdiń jańa qaǵıdalaryn bekitti. Bul qujatty jergilikti normalardy Qazaqstan zańnamasynyń sońǵy ózgeristerine sáıkes keltirý úshin qalanyń Kásipkerlik jáne ınvestısııalar basqarmasy ázirlegen.
Jańa erejeler turǵyndardyń qaýipsizdigi men qalanyń tazalyǵyn saqtaýǵa baǵyttalǵan. Erejege sáıkes úı janýarlary ıeleriniń quqyqtary belgilendi. Endi haıýanattardyń kóshedegi minez-qulqy úshin jaýapkershilik kúsheıe túsedi. Mysaly, olardy qaraýsyz qaldyrýǵa tyıym salynady. Eger kenetten ıesi oǵan kútim jasaı almasa, ýaqytsha baspana taýyp, qamqorlyqty úshinshi tulǵaǵa berýi tıis nemese ony haıýanattar baǵyna ornalastyrýy kerek.
Ásirese, ıtterge erekshe nazar aýdarylady. Olardy óz betinshe serýendetýge bolmaıdy jáne aınalasyndaǵylarǵa qaýip tóndirmeıtindeı jaǵdaıda alyp júrýi kerek. Qoǵamdyq oryndarda qarǵybaýynyń uzyndyǵy eki metrden aspaǵany jón. Al kópshilik oryndarda, tasymaldaý kezinde jáne jergilikti atqarýshy organdar, uıymdar, mekemeler belgilegen arnaıy aımaqtarda ıtke tumyldyryq kıgizilýi tıis. Úı aýlasynda qorshaýy joq ıtterdi qarǵybaýmen ustaý qajet. Al arnaıy baqylaýdy qajet etetin ıtteri bar ýchaskelerdiń qaqpasynda eskertý belgisi ilinýi mindetti.
«Jattyǵý alańy» men «Erkin serýendeý» sııaqty jańa uǵymdar da Almatynyń barlyq turǵyndary úshin mindetti erejeler qataryna qosyldy.
