Ajyrasý kórsetkishi alańdatarlyq deńgeıde
Ulttyq statıstıka bıýrosynyń málimetine sáıkes, 2023 jyly elimizde 120,8 myń neke tirkelip, onyń 40,2 myńy ajyrasýmen aıaqtalǵan. Sonymen qatar, beıresmı túrde tirkelmegen, biraq ómirde joly ekige aıyrylǵan otbasylar sany da az emes. Búginde 400 myń áıel men 60 myń er azamat jalǵyzbasty ata-ana retinde tirkelgen.
Memlekettik deńgeıde naqty sheshimder qajet
Depýtattyń pikirinshe, otbasynyń kúıreýi – tek jeke tragedııa emes, el bolashaǵyna tikeleı áser etetin qaýip. Osyǵan baılanysty ol Úkimet basshysy Oljas Bektenovke tómendegi tórt naqty usynysty joldady:
-
Ajyrasýǵa baılanysty memlekettik baj tóleý tártibin engizý.
Erli-zaıyptylardyń sotqa birjaqty aryz berýine deıin joǵary mólsherdegi memlekettik baj engizý usynylady. Sonymen qatar, resmı túrde ajyrasqan azamattarǵa tabys salyǵynyń mólsherlemesin kezeń-kezeńimen arttyrý máselesi qaralýy tıis. -
Bitimgershilik keńesteri arqyly tatýlastyrý.
Ajyrasýǵa ótinish bergen juptardy sotqa deıin jergilikti qoǵamdastyq keńesteri, ardagerler alqasy, ımamdar men áıelder keńesi sııaqty konsýltatıvtik qurylymdardyń qaraýyna berý usynylady. Bul – ulttyq dástúr men zamanaýı tásilderdiń úılesimdi sheshimi bolmaq. -
«Jas otbasy» ulttyq baǵdarlamasyn ázirleý.
Jańadan nekege otyrǵan jas jubaılarǵa turǵyn úı, bala kútimi, balabaqsha, jumysqa ornalasý jáne salyqtyq demalys sekildi keshendi qoldaý sharalaryn usyný mańyzdy. Baǵdarlama aıasynda ıpotekalyq jeńildikter men arnaıy járdemaqylar da qarastyrylýy qajet. -
«Qarapaıym toı – berekeli otbasy» aqparattyq-ıdeologııalyq naýqany.
Jastar arasynda qarjylyq saýattylyqty arttyrý jáne nesıege toı jasamaýǵa úndeý maqsatynda keń aýqymdy qoǵamdyq qozǵalys bastaý usynyldy. Bul bastamaǵa qoǵam qaıratkerleri, din ókilderi, medıa men blogerlerdi tartý usynylady.
Ulttyq qaýipsizdik turǵysynan qaraý qajet
Depýtat óz saýalynda: "Ajyrasý – tek eki adamnyń taǵdyry emes, bul tutas urpaqtyń, qoǵam men memlekettiń turaqtylyǵyna áser etetin másele. Sondyqtan otbasylyq qundylyqtardy saqtaý – ulttyq qaýipsizdik deńgeıinde qaralýy tıis" dep atap ótti.
