Munaı baǵasy 50 dollardan túskende teńge baǵamy ózgerýi múmkin

ASTANA. 12 aqpan. Munaı baǵasy osylaısha tómendeı beretin bolsa, teńge baǵamynda birtindep ózgerister bolady degen boljam bar. Bul týraly Ulttyq bank tóraǵasy Qaırat Kelimbetovtiń sózine silteme jasaǵan Tengrinews.kz tilshisi habarlady. «Eger munaı baǵasy 50 dollardan tómen tússe, jaǵymsyzdaý ssenarıılerdi júzege asyramyz. Ondaı jaǵdaıda teńgeni aýystyrý baǵamynda birqalypty ózgeris bolady degen boljam bar. Bul jerdegi áńgime aıyrbas baǵamy dáliziniń keńeıýi arqyly munaı baǵasynyń tómendeýi men jyldyq ortasha baǵa týraly aıtylyp otyr», - dep túsindirdi Bank tóraǵasy Ortalyq kommýnıkasııalar qyzmetinde ótken brıfıngte. Alaıda, dál búgin ondaı alańdaýshylyqqa negiz joq. «Qazirgi tańda munyń alǵysharttary baıqalmaıdy. Makroekonomıkalyq kórsetkishter buǵan negiz bermeıdi. Sonymen qatar, qazirgi dáliz bizdiń dál sol jerde bolýymyzǵa múmkindik berip otyr - dollar 185 teńge turady», - dedi Kelimbetov. Aıta keteıik, 11 aqpan kúni Aqordada ótken Úkimettiń keńeıtilgen otyrysynan keıin Qaırat Kelimbetov Qazaqstanda bir sáttik devalvasııa bolmaıdy dep málimdegen edi. Úkimettiń keńeıtilgen otyrysynda Qazaqstan Prezıdenti Nursultan Nazarbaev qazaqstandyqtardy teńge baǵamynyń ózgerisi týraly qaýesetterge senbeýge shaqyrdy. «Búgin Ulttyq banktiń tóraǵasy bul máselelerdi sheshý úshin barlyq sharalar jasalyp jatqanyn baıandady. Oǵan senbeýge negiz joq», - dedi Memleket basshysy. Sáken Maılybaı. Derek, foto: Tengrinews.kz.