Jýyrda bank nesıeleri teńgemen berile bastaıdy

ASTANA. 12 aqpan. Jýyq arada elimizde nesıeni teńgemen berý bastalady. Bul týraly Ulttyq bank tóraǵasy Qaırat Kelimbetovtiń sózine silteme jasaǵan Tengrinews.kz habarlady. Ulttyq bank tóraǵasy muny Ortalyq kommýnıkasııalar qyzmetiniń brıfınginde aıtty. Qaırat Kelimbetov jýrnalısterdiń: «Nege ekinshi dárejeli bankter nesıeni ulttyq valıýtamen emes, dollarmen berip jatyr?» degen suraǵyna jaýap berdi. «Bankter bir sáttik devalvasııa bolady dep eseptegendikten, sondaı tabıǵı reaksııa boldy, olar bir jaǵynan valıýta nesıesin berý jolymen óz valıýta qaýipterin saqtandyrdy, ekinshi jaǵynan olarda teńgeniń beriktigine qatysty oqys tapshylyq baıqaldy», - dedi ol. Ulttyq bank basshysy jýyq arada bul másele sheshiletinin aıtyp, eshqandaı bir sáttik devalvasııa bolmaıtynyn taǵy qaıtalady. «Bári sabyrǵa kelip, aldyńǵy jyldary bolǵan qalypty, iskerlik aınalymǵa kirisýi kerek, ıaǵnı teńgeden dollarǵa qaıtadan jappaı aıyrbastaý bastalady. Men taǵy da eske salǵym keledi - teńge depozıtteri 10 paıyzǵa deıin, dollar túrindegi depozıtter úsh paıyzdan aspaıtyn mólsherde tabys tabýǵa múmkindik beredi. Sáıkesinshe, olar úshin de, jeke zańdy tulǵalar úshin de, kvazımemlekettik uıymdar úshin de valıýta qaýpi joq. Qysqamerzimdi tapshylyq kezeńinde biz tıisti qarajatty ekinshi dárejeli bankterge usynatyn bolamyz. Olar eń taıaý arada nesıeni teńgemen bere bastaıdy dep oılaımyn», - dedi Qaırat Kelimbetov. Onyń pikirinshe, bul sharalar ekonomıkadaǵy ahýaldy turaqtandyrady. Eske salaıyq, 11 aqpan kúni Memleket basshysy Úkimettiń keńeıtilgen otyrysyn ótkizgen edi. Onyń barysynda Nursultan Nazarbaev halyqty «teńge baǵamynyń ózgerý múmkindigi týraly qaýesetterge senbeýge» shaqyrdy. Sáken Maılybaı. Derek, foto: Tengrinews.kz.