Sýretti túsirgen - Aqádil Rysmahan
Jıynǵa ǵylymı-zertteý ınstıtýtynyń ókilderi, aýyl sharýashylyǵy salasynyń ǵalymdary jáne agrobıznes ókilderi, aýdan basshylary men sharýa qojalyq jetekshileri qatysty. Semınar Memleket basshysy Qasym-Jomart Toqaevtyń Ulttyq quryltaıdyń IV otyrysynda aýyl sharýashylyǵy salasyna qatysty bergen tapsyrmalaryn talqylaýǵa jáne olardy iske asyrý joldaryn aıqyndaýǵa arnaldy.
Is-sharada aýyl sharýashylyǵy kórmesi men «QazMeatExport» sharýa qojalyǵynyń egistik alqaby kópshilik nazaryna usynyldy. Aıdarbek Saparov jergilikti taýar óndirýshilerdiń ónimin joǵary baǵalap, jumystaryna tabys tiledi.
Oblys ákimi Erbol Qarashókeevtiń aıtýynsha, aýyl sharýashylyǵyn damytpaı, básekege qabiletti ekonomıka qurý múmkin emes, sondyqtan saladaǵy jumysty shıratýǵa barlyq tarap múddeli bolýy tıis.
«Memleket basshysy men Úkimettiń qoldaýy aýyl sharýashylyǵy salasynyń damýyna tyń serpin berdi. Alda bizdi egistikti sıfrlandyrý, aýyl sharýashylyǵy tehnıkasyn jańartý, egis alqaptaryn ártaraptandyrý, sýarmaly jerlerdiń kólemin arttyrý, mıneraldy tyńaıtqyshtardy engizý jáne sharýalardy joǵary ónimdi tuqymdarmen qamtamasyz etý syndy aýqymdy mindetter kútip tur. Aýyl sharýashylyǵynyń strategııalyq mańyzyn eskersek, zamanaýı ǵylymı jetistikterdi tıimdi paıdalanýdyń mańyzy zor», deıdi E. Qarashókeev.
Mınıstr A. Saparovtyń aıtýynsha, agrarlyq salany qoldaý úshin bılik tarapynan qarastyrylǵan qarjy kólemi jyl saıyn artyp keledi. Sharýalarǵa memlekettik qoldaýdyń tetigin túsindirý úshin sala mamandary bilek túrip jumys isteýi kerek.
«Jambyl oblysynda aýyl sharýashylyǵyna jiti kóńil bólinip, veterınarııa salasyna jańashyldyqtar engizildi. Mal dárigerleri qyzmettik kólikpen qamtylyp, veterınarııalyq pýnktterdiń qurylysy qarqyndy júrgizilip jatyr. Bul jumystar kórsetiletin qyzmettiń sapasyn jaqsartyp, halyqtyń turmys deńgeıin kóterýge yqpal etedi» deıdi A. Saparov.
Jambyl oblystyq aýyl sharýashylyǵy basqarmasynyń basshysy Qaırat Kóshenovtiń aıtýynsha, bıyl salany damytýǵa 48,2 mlrd teńge bólindi. Búginge deıin 3,4 myń sharýaǵa memlekettik qoldaý kórsetildi. Nátıjesinde I toqsannyń qorytyndysy boıynsha 38 mlrd teńgeniń aýyl sharýashylyǵy ónimi óndirilip, salaǵa 4,1 mlrd teńge ınvestısııa tartyldy.
Bıyl 641,2 myń gektarǵa aýyl sharýashylyǵy daqyldaryn ornalastyrý josparlanǵan, bul ótken jylmen salystyrǵanda 14,5 myń gektarǵa artyq.
Kóktemgi dala jumystaryna Úkimet tarapynan 20 myń tonna dızel otyny bólindi. Qazirgi tańda sharýalarǵa taratý jumystary bekitilgen josparǵa sáıkes júrgizilip jatyr. 498, 5 myń gektar alqapqa 99,7 myń tonna mıneraldy tyńaıtqysh engizý josparlanǵan.
Jıynda sóz alǵan Qazaq eginshilik jáne ósimdik sharýashylyǵy ǵylymı-zertteý ınstıtýtynyń Basqarma tóraǵasy Sholpan Bastaýbaeva jambyldyq sharýalarmen tyǵyz yntymaqtastyqta jumys isteýge daıyn ekenin jetkizse, Qazaq jemis-kókónis sharýashylyǵy ǵylymı-zertteý ınstıtýtynyń Basqarma tóraǵasy Temirjan Aıtbaev Jambyl oblysynda tuqym sharýashylyǵyn damytý jóninde bastama kóterip, naqty baǵyt-baǵdaryn usyndy.
Keıinnen vedomstvo basshysy jańa tıptik úlgide salynǵan veterınarııalyq pýnktti aralap, «Alel Agro» AQ-nyń táýligine 144 myń bas taýyq etin óńdeıtin kombınatynyń qurylys barysyn kórdi. Sonymen birge asa qaýipti Marokko shegirtkesine qarsy hımııalyq kúres sharalaryn zerdeledi.
Jambyl oblysy
