Jańa rekordtyń jaı-japsaryn keńirek baıandaıtyn bolsaq, Almatynyń Jetisý aýdanynda Qazaqstan halqynyń Birligi kúni Aınabulaq shaǵynaýdanyndaǵy №4 mamandandyrylǵan balalar-jasóspirimder sport mektebinde ótken edi. Osy merekede el tarıhyndaǵy eń uzyn – 1704 metr bolatyn laǵman sozylyp, bul málimet Qazaqstannyń Rekordtar kitabynda resmı túrde tirkeldi.
Bir jaǵynan bul jaı ǵana gastronomııalyq oqıǵa emes, kópultty shahar turǵyndarynyń aýyzbirshiliginiń nyshany ispetti, júrekkke jylylyq uıalatqan sátter edi. Almatynyń 50-den astam aspazy men aýdan turǵyndary eki saǵattyń ishinde laǵmannyń qamyryn ılep, eń uzyn laǵmandy daıyndap úlgerdi. Túrli etnostardyń ókilderi ortaq dastarhan úshin birlik tanytyp, bir kisideı kúshin saldy.
Qazaqstan Rekordtar kitabynyń resmı ókili Baqytjan Sábıtuly: «Laǵman qansha metr bolsa da jańa rekord ornatyldy, óıtkeni mundaı is-shara elimizde alǵash ret ótkizilip otyr. Biz laǵmannyń uzyndyǵyn ǵana emes, ultaralyq baılanystardyń beriktigin de bekitemiz», dedi.
Dál osy kúni bir ústeldiń aınalasynan qazaq, uıǵyr, ózbek, dúngen, koreı men basqa ult ókilderi tabyldy. Bireý qamyr ılese, ekinshisi ıin keltirip, kóńildi júrdi. Jınalǵandar úshin bul kún naǵyz merekege aınalyp, onda árkim ózin úlken, tatý otbasynyń bir bóligi retinde sezindi.
«Árbir qatysýshynyń aldynda qamyrdyń úzilmeýin qadaǵalaý mindeti turdy. Keıbir qıyndyqtarǵa qaramastan, aspazdarymyz údeden shyqty», – deıdi Almaty qalasy Jetisý aýdandyq Analar keńesiniń tóraıymy Rahıma Omarova.
Aspazdyq oqıǵaǵa bolysqan Zýhra Izmasova rekord ornatýdyń ózi qıyndyǵy bolatynyn moıyndap: «Sál aýyr, tym uzyn laǵman, biraq tapsyrma neǵurlym qıyn bolsa, soǵurlym qyzyqty bolady eken», deıdi.
Jetisý aýdanynyń Ardagerler keńesiniń tóraıymy Tamara Shákirova da is-sharanyń jumysshy mamandyqtar jylyna arnalǵanyn atap óte kele: «Qoǵamdyq tamaqtaný oryndarynyń kópshiligi Jetisý aýdanynda shoǵyrlanǵan. Búgin shyǵys taǵamdary aspazshylarynyń jumysy kórsetildi. Mundaı keremetti árkim jasaı almaıdy. Qarapaıym jumysshylardy da qadirleı bilý kerek», deıdi.
Osylaısha, Jetisý aýdanynyń turǵyndary men etnomádenı ortalyqtary aıtýly oqıǵaǵa uıytqy bola bildi.
