Sýretti túsirgen Aqádil Rysmahan
Ár túrli ult pen ulystyń ózine tán qundylyqtary dáriptelgen is-sharada sport túrlerinen jarys uıymdastyrylyp, úzdik shyqqandar marapattaldy. Is-sharaǵa jınalǵan etnos ókilderin óńir basshysy Erbol Qarashókeev birlik merekesimen quttyqtady.
«Tatýlyq pen kelisimniń arqasynda táýelsiz memleketti qalyptastyryp, aýyz toltyryp aıtarlyqtaı tabysqa jettik. Túrli etnos ókilderi bir týdyń astynan tabylyp, eńsesi tik elge, irgeli memleketke aınaldyq.
Yntymaǵy jarasqyn Jambyl óńirin meken etken 87 etnos ókili elimizdiń turaqtylyǵyna atsalysyp, óńirdiń barlyq salasynda eleýli eńbek etip júr. Memleket pen qoǵam arasynda syndarly dıalog ornatýǵa óńirdegi 78 etnomádenı birlestik óz yqpalyn tıgizip otyr.
Birligi myǵym eldiń bolashaǵy jarqyn bolatyny daýsyz. Beıbitshilik pen kelisim saltanat qurǵan jerde el ıgiligi úshin nátıjeli ister atqarylatynyna eshkimniń kúmáni joq. Prezıdent Assambleıanyń HHHIV sessııasynda júktegen mindetterdi jumylǵan judyryqtaı júzege asyratynymyzǵa senimim zor», dedi oblys basshysy.
Is-shara barysynda óńirdegi etnosaralyq kelisimdi nyǵaıtýǵa súbeli úles qosqan azamattar marapattaldy. Olar Memleket basshysynyń Jarlyǵyna sáıkes «Qazaqstan halqy Assambleıasyna 30 jyl» medaline jáne «oblysqa sińirgen eńbegi úshin» tósbelgisi men Qurmet gramota jáne Alǵys hatqa ıe boldy.
Mereke kúni etnomádenı birlestik ókilderi men Kenen Ázirbaev atyndaǵy oblystyq fılarmonııa ujymy usynǵan konserttik baǵdarlama kópshilikke kóterińki kóńil-kúı syılady. Is-shara sońy «Shattyq» bıimen túıindeldi.
Taraz
