Búginde Oqý-aǵartý mınıstrligi aýyl mektepterindegi bilim sapasyn arttyrý baǵytynda aýqymdy jobalardy qolǵa alyp otyr. Bul bastamalardy iske asyrýda ádistemelik ortalyqtardyń róli aıryqsha. Osy oraıda, «943 – elimizdiń maqsatty mektepterin damytý» jobasy aıasynda jobalyq keńse ádiskerlerine arnalǵan qysqamerzimdi taǵylymdama uıymdastyrylyp, sala mamandary kásibı quzyrettilikterin shyńdaýǵa múmkindik aldy.
Is-sharaǵa qashyqtyqtan jaýapty mınıstrliktiń Orta bilim komıtetiniń tóraǵasy Qanybek Jumashev, Y.Altynsarın atyndaǵy Ulttyq bilim akademııasynyń Prezıdenti mindetin atqarýshy Anar Táńirbergenova, óńirlik bilim basqarmasynyń basshysy Dáýren Júnisov jáne ádiskerler qatysty.
Oblystyq ádistemelik ortalyqtyń dırektory Ǵalııa Mýhmetovanyń aıtýynsha, «943» jobasy aıasynda Jetisý oblysynan 57 mektep tańdalyp alynǵan. Bul mektepterdiń pedagogteri 11 pán boıynsha bazalyq, negizgi jáne ilgeri deńgeıdegi biliktilik arttyrý kýrstarynan ótken. Sonymen qatar, ádiskerlerdiń jetekshiligimen maqsatty mektepterdiń jeke damý josparlary men portretteri ázirlenip, júıeli baqylaý jáne monıtorıng júrgizilýde.
Taǵylymdama barysynda ár óńirden kelgen 15 ádisker óz jobalaryn ortaǵa salyp, tıimdi tásilderimen bólisti. Ádistemelik ortalyqtyń ataýyn ózgertý týraly usynystar da qarastyryldy.
Astana qalalyq ádistemelik ortalyǵynyń Taldaý jáne monıtorıng bóliminiń basshysy Anar Dosmuhametqyzy Jetisý óńiriniń ádistemelik tájirıbesin joǵary baǵalap, taǵylymdamadan kóp nárse úırenýge bolatynyn atap ótti. Ol Astanadan arnaıy kelip, óz jobalaryn — «Sheberlik tálim» men «Matematıka klýbyn» tanystyrdy.
Plenarlyq májilisten soń taǵylymdama sheberlik-synyp formatynda jalǵasty. Alakól men Kerbulaq aýdandary ózara tıimdi árekettesý máselesin talqylasa, Kóksý men Sarqan aýdandary «Jobalyq keńseniń sapaly quramy: úzdik tájirıbeler» taqyrybynda óz damý josparlary men oqytý baǵdarlamalaryn usyndy.
Panfılov aýdanynda jalǵasqan taǵylymdama aıasynda qatysýshylar aýdannyń maqsatty mektepterimen tanysty. Olardyń qatarynda D.Qonaev atyndaǵy mektep, Abaı atyndaǵy orta mektep jáne №6 mektep-ınternat bar.
Odan keıin Eskeldi, Aqsý, Tekeli jáne Taldyqorǵan qalalaryndaǵy ádistemelik ortalyqtar oqytý sapasyn arttyrý, pedagogterdi testileýge daıyndaý jáne bilim sapasyn basqarý baǵytynda tájirıbelik jumystaryn kórsetti.
Taǵylymdamanyń sońǵy kúni Y.Altynsarın atyndaǵy orta mektepte ótken jobalyq sessııada pedagogıkalyq áleýetti damytý joldary men tabysty mektepterdiń tájirıbesi keńinen talqylanyp, jol kartalary ázirlendi. Qorytyndylaı kele qatysýshylar alǵys hattar men arnaıy sertıfıkattarǵa ıe boldy.
