Assambleıalyq depýtattar esep berdi

Almatydaǵy Dostyq úıinde  Qazaqstan halqy Assambleıasynan (QHA) saılanǵan Parlament Májilisi depýtattarynyń QHA jáne etnomádenı birlestikter múshelerimen kezdesýi ótti. Atalǵan is-sharaǵa   Májilis depýtattary Jumataı Álıev, Egor Kappel, Roman Kım, Ahmed Muradov, Nadejda Nesterova, Iýrıı Tımoshenko, QHA Keńesiniń músheleri, respýblıkalyq etnomádenı birlestikterdiń jetekshileri, qoǵam qaıratkerleri qatysty. Kezdesý barysynda de­pý­tattardyń atqarǵan jumystary boıynsha jeke-jeke esepteri tyńdalyp, QHA jyly aral­y­ǵynda atqarǵan is-sharalarynyń qorytyndysy jarııa etildi. Son­daı-aq, QHA jylyn uıym­dastyrý jáne ótkizý boıyn­sha ótken memlekettik komıssııa otyrysynda júktelgen tapsyrmalar qarastyryldy. – Bizdiń Almatyǵa atbasyn burýdaǵy maqsatymyz – Qa­zaqstan halqy Assambleıasynan saılanǵan depýtattar ózderiniń 3,5 jylda atqarǵan jumystary týraly baıandap berý, – dedi depýtattyq toptyń jetekshisi Jumataı Álıev. – Bıyl QHA-ǵa 20 jyl toldy. QHA – El­ba­synyń noý-haýy. Assambleıa – elimizdegi etnosaralyq jáne kon­fessııaaralyq kelisimniń biregeı modeli. Munda ulty men dinine qaramastan árbir aza­mat Konstıtýsııa kepildik ete­tin azamattyq quqyq pen bos­tan­dyqty tolyǵymen paıdalanady. Al Parlament ózderińiz bilesizder, zań shyǵarýshy organ. Endeshe, osy asa jaýapty iste QHA-dan saılanǵan toǵyz depýtat qandaı úles qosty degenge kelsek, olardyń barlyǵy ár beıindegi komıtetterde jumys isteıdi. Olardyń árqaısysy jumysshy toptyń jetekshisi nemese múshesi. Olar áleýmettik, agrarlyq, t.b. saladaǵy árbir qabyldanǵan zańdarǵa, elimizdegi tynyshtyqqa, kelisimge óz úlesterin qosyp jatyr. Jalpy alǵanda, osy ýaqyt aralyǵynda saılanǵan depýtattardyń top jetekshisi retinde aıtarym, olardyń árqaısysy ózderin qaı jaǵynan bolsyn saýatty, belsendi kórsete bildi. Olardyń árqaısysy Parlamenttegi áriptesteriniń arasynda abyroıly, sondaı-aq, halyqtyń arasynda da bedeli joǵary. Olar ózderiniń, bolmasa basqa da túrli etnost ókilderiniń múddesin emes, qazaqstandyq ıdeıany, qazaqstandyq patrıottyq sezimdi qorǵady. Qoǵamdyq kelisimdi saqtaýǵa úles qosty. Al keshegi saılaýdaǵy Prezıdentimizdiń jeńisi halqymyzdy odan ári biriktirdi. – QHA atynan saılanǵan depýtattar arasynda Májilistiń 7 komıtetinde jumys jasaıtyn ókilimiz bar, – dedi óz sózinde depýtat Nadejda Nesterova. – Osy úsh jarym jylda bizdiń depýtattyq top naǵyz pikirtalas alańyna aınaldy. Bizdiń jıyndarda óte ózekti máseleler sheshiledi. Árıne, pikirler ártúrli, únemi qyzý pikirtalas bolady. Meniń ózim úsh jylda 56 zań jobasyna qorytyndy shyǵardym. Búgingi tańda jumys toby 39 otyrys ótkizdi. Qazaqstan Prezıdenti, QHA Tóraǵasy Nursultan Nazarbaevtyń oblystyq máslıhat ishinde bizdiń jumys tobyna uqsas depýtattyq toptardy qurý týraly tapsyrmasy da óz deńgeıinde oryndaldy. Atalǵan toptar Qazaqstanda beıbitshilik pen kelisim máselelerin qadaǵalaıtyn bolady, – dedi Nadejda Nesterova. Sondaı-aq, sóz alǵan depýtat Egor Kappel búgingi kezdesýde burynǵy depýtattardy da kórip otyrǵanyn, al QHA músheleri, etnomádenı birlestikter QHA-dan saılanǵan depýtattardyń esebin tyńdaýǵa mindetti ekenin, óıtkeni, olar da bizdiń ne istep, ne qoıyp jatqanymyzdy bilýleri kerektigin, al depýtattardyń árqaısysy óz ımıdjderin jasaýy qajettigin aıtsa, depýtat Ahmed Muradov barlyǵymyzdyń Qazaq­stannyń patrıottary ekenimizdi umyt­paýǵa shaqyryp, QHA-nyń búginde halyqaralyq ınstıtýtqa aınalyp otyrǵanyn jetkizdi. Dóńgelek ústelge qatysýshylar atynan sóz alǵan etnomádenı bir­les­tikterdiń ókilderi Assambleıadan saılanǵan depýtattardyń jumysyna oń baǵa berip, óz usynystaryn da bildirip jatty. Máselen, «Ahyska» etnomádenı birlestiginiń tóraǵasy Zııatdın Kasanov QHA-dan saılanǵan Parlamenttegi depýtattar olardyń betke ustar ókilderi ekenin, sondyqtan joǵary deńgeıde kórgileri keletinin, osyndaı kezdesýler júıeli túrde ótkizilip tursa, máselen, 3 aı saıyn eki depýtat osylaı esep berip otyrsa, sonda olardyń da jumystary kórinetinin, sondaı-aq, usynystary da Parlamentte aıtylatynyn jetkizdi. «Menińshe, Assambleıa jergilikti jerlerde – aýyldarda, aýdandarda jaqsy jumys jasaýy kerek. Ol úshin Assambleıany joǵarydan tómen – halyqqa jaqyndatsa, onyń bedeli odan da arta túser edi», – dedi ol. Kezdesý sońynda belsendiler, QHA men etnomádenı birlestikterdiń músheleri «Qazaqstan halqy Assam­bleıasyna – 20 jyl» mereıtoılyq medaldarymen marapattaldy. Gúlzeınep SÁDIRQYZY, «Egemen Qazaqstan».