Ulttyq bank basshysy esepshottardy qoldanýǵa shaqyrdy

ASTANA. 12 aqpan. Elimizdiń azamattary páter men avtokólikterdi qolma-qol aqshamen emes, basqa joldarmen satyp alsa, durys. Ulttyq bank tóraǵasy Qaırat Kelimbetov osylaı dedi. Bul týraly «QazAqparat» habarlady. «Bizdiń oıymyzsha, iri saýdalar, máselen, páter nemese kólik quralyn satyp alý qolma-qol aqshamen emes, basqa joldarmen jasalǵany durys. Eń bastysy qarajat belgili bir shottar arqyly ótýi kerek, osylaısha biz salyq organdarymen birge barlyq tólemderdi kórip otyra alamyz. Sondyqtan, az ýaqyttyń ishinde osy salada birshama tııanaqtylyqqa qol jetkizemiz dep oılaımyz», – dep túsindirdi ol. Q. Kelimbetovtiń aıtýynsha, búginde Qazaqstandaǵy barlyq tranzasııalardyń 93 paıyzy qolma-qol tólenedi. «Bul qazirgi kezde kez kelgen ekonomıkadaǵy soraqy jaǵdaı, nege deseńizder, barlyq osy tólemder salyqtan tysqary, kóleńkede qalady. Biz bul salany azdap tártipke keltirý kerek dep oılaımyz, sonymen qatar, dollarmen esepteletin baǵalardy da retteý qajet. Biz elimizdegi baǵanyń qalyptasýy ulttyq valıýtaǵa negizdeletinin sanamyzǵa ábden sińirýimiz qajet», – dep túıdi tóraǵa. Joldybaı Bazar. Derek, sýret: «QazAqparat».