Bul sheshimge stýdentterdiń sabaqqa qatysý kórsetkishiniń kúrt tómendeýi sebep bolǵan. QR Ǵylym jáne joǵary bilim mınıstrliginiń tekserisi barysynda anyqtalǵan derekterge sáıkes, ýnıversıtette bilim alýshylardyń 90 paıyzy oqý prosesine qatyspaǵan.
«2024–2025 oqý jylynyń sońynda QOHÝ bilim berý qyzmetin toqtatatynyn habarlaımyz. Bul sheshim stýdentterdiń sabaqqa qatysýynyń 90%-ǵa deıin tómendeýi men ishki tekseris nátıjeleri negizinde qabyldandy. Osyǵan baılanysty, oqý jyly aıaqtalǵan soń, basqa joǵary oqý oryndaryna resmı túrde aýysýlaryńyzdy suraımyz. 2025–2026 oqý jylynan bastap tańdaǵan ýnıversıtetterińizde oqýlaryńyzdy jalǵastyratyn bolasyzdar», delingen ýnıversıtettiń stýdentterge joldaǵan resmı habarlamasynda.
Bul aqparatty ýnıversıtet basshylyǵy da rastap otyr. Bilim ordasynyń ókilderi stýdentterdiń sabaqqa qatyspaýy ǵana emes, oqytýshy-professorlar quramynyń jetkiliksizdigi de nazarǵa alynǵanyn aıtyp otyr.
«Iá, bul – shyndyq. Birqatar kemshilikter birinen soń biri anyqtalyp, ýnıversıtet ıeleri joǵarǵy oqý ornyn jabýǵa májbúr boldy. Degenmen, barlyq stýdentterdiń oqýlaryn basqa ýnıversıtetterde jalǵastyrýyna múmkindik berilgen. Eshkim dalada qalmaıdy», dep málimdedi oqý ornynyń basshylyǵy.
QR Ǵylym jáne joǵary bilim mınıstrligi Ǵylym jáne joǵary bilim salasyndaǵy sapany qamtamasyz etý komıteti tóraǵasynyń orynbasary Artýr Jaýhanulynyń aıtýynsha, bıyl mınıstrlikke ýnıversıtet quryltaıshysynan resmı málimdeme kelip túsken.
Málimdemege sáıkes, bilim berý qyzmetiniń oqý jyly aıaqtalǵan soń toqtatylyp, ary qaraı joǵary bilimdi mamandardy kadrlyq daıarlaý qyzmetine shekteý qoıylatyny aıtylǵan bolatyn. Tek qana birneshe bilim berý baǵdarlamalary toqtatylǵany bolmasa, 2024-2025 oqý jylynda atalǵan ýnıversıtet bilim berý qyzmetin jalǵastyrdy.
«Bıylǵy jyly naýryz aıynda birneshe júzdegen stýdentterdi oqýdan shyǵarylýyna baılanysty túrli máseleler kóterilgen bolatyn. Sáıkesinshe, mınıstrlik tarapynan sáýir aıynda atalǵan joǵary oqý ornyna memlekettik baqylaý sharasy júrgizildi. Nátıjesi boıynsha, bilimniń sapasyna baılanysty, stýdentterdiń bilim alýyna qajetti jaǵdaı jasalý deńgeıine qatysty túrli suraqtar paıda boldy. Degenmen, Qazaq-orys halyqaralyq ýnıversıtetin lısenzııasynan aıyrý týraly sheshim búgingi tańda kúshine engen joq, ıaǵnı, bıylǵy jyly stýdentterdiń oqýyn tolyqtaı aıaqtap, qoldaryna tıisti dıplomdaryn alyp shyǵý úshin tolyq jaǵdaı jasalǵan. Iаǵnı, 2025 jylǵy mamyrdaǵy jaǵdaı boıynsha, Qazaq-orys halyqaralyq ýnıversıteti lısenzııasy zańdy kúshinde, oqýdy tolyq aıaqtap shyǵýǵa, emtıhandardy ýaqytyly tapsyrýǵa tolyq múmkindik bar», deıdi Artýr Jaýhanuly.
Mınıstrlik ókilderi ata-analarmen arnaıy kezdesý ótkizip, stýdentterdiń basqa oqý oryndaryna aýysý tártibi jaıly túsindirý jumystaryn júrgizgen. Qazaqstan Respýblıkasynyń «Bilim týraly» zańynyń 42-babyna sáıkes, bilim berý qyzmeti toqtatylǵan jaǵdaıda, oqý orny stýdentterdi eki aıdyń ishinde ózge joǵary oqý oryndaryna ornalastyrýǵa jáne barlyq qujattardy memlekettik arhıvke tapsyrýǵa mindetti.
Bıyl oqýdy aıaqtaıtyn stýdentterge dıplom men qujattaryn ýaqtyly berý de zań aıasynda qatań baqylanatyn bolady. Sonymen qatar, 1, 2 jáne 3-kýrs stýdentterin kórshiles joǵary oqý oryndaryna aýystyrý máselesi de sheshimin tabady.
Aıta keteıik, QOHÝ bıylǵy sáýirde úlken daýǵa ilikken bolatyn. Ýnıversıtet 350 stýdentti oqý aqysyn tólemegeni jáne júıeli túrde sabaqqa qatyspaǵany úshin oqýdan shyǵarǵan. Bul jaǵdaı stýdentterdiń narazylyǵyn týdyrǵan.
Oqıǵaǵa baılanysty mınıstrlik komıssııasy oqý ornyna arnaıy baryp, tekseris júrgizdi. Nátıjesinde, stýdentterdiń oqýdan shyǵarylýy zańsyz dep tanylǵan.
Aqtóbe Qazaq-orys ýnıversıteti 1994 jyly Temirhan Berdimýratovtyń bastamasymen qurylǵan jeke menshik joǵary oqý orny.
