Is-shara sap túzeýden bastalyp, memlekettik tý kóterilip, jas sarbazdar Otan aldyndaǵy anttaryn qabylady. Bul – olardyń erlikke, adaldyqqa jáne áskerı paryzyn minsiz atqarýǵa bergen serti.
Saltanatty jıynda QR UQK Shekara qyzmetiniń Almaty oblysy boıynsha departamentiniń bastyǵy, polkovnık Álibek Kaıýpov, «Zastava tarlandary» respýblıkalyq qoǵamdyq uıymnyń tóraǵasy, qordaǵy polkovnık Dáýletqalı Mamyrqanov, Raıymbek aýdany boıynsha Shekara basqarmasynyń bastyǵy, polkovnık Nurtaı Sahıev qatysyp, azamattyq boryshyn óteýdi paryz sanaǵan jas sarbazdarǵa antqa adal bolyp, óz mindetterin abyroımen atqarýǵa tilektestikterin bildirdi.
«Qazaqstan Respýblıkasy Ulttyq qaýipsizdik komıtetiniń Shekara qyzmeti – elimizdiń tynyshtyǵy men beıbitshiliginiń kepili. Almaty oblysynyń Uıǵyr, Raıymbek, Kegen aýdandary boıynsha Shekara basqarmasynda qyzmet atqaratyn sizder Otanymyzdyń shekarasyn qorǵaýda mańyzdy ról atqarasyzdar. Antqa adal bolý – bul Otanǵa qyzmet etýdiń eń bıik kórinisi. Shekara – eldiń qalqany, al sarbaz sol qalqannyń myzǵymas tiregi, el tynyshtyǵy úshin bar kúsh-jigerlerińizdi aıamaı qyzmet etetinderińizge senimdimiz», – degen Uıǵyr aýdanynyń ákimi Bota Serikqyzy jas sarbazdarǵa myqty densaýlyq, qajymas qaırat jáne elge adal qyzmet etýlerine tilektestigin bildirdi.
Merekelik shara sarbazdardyń tótenshe jaǵdaılarda senimdi ári úılesimdi áreket ete alatyny taktıkalyq is-qımyldar kórsetýmen jalǵasyp, daıyndyq deńgeıi men tártibin kórermender tamashalady.
Almaty oblysy.
