Keshe «Nur Otan» partııasy Tóraǵasynyń birinshi orynbasary Baýyrjan Baıbektiń, «Nur Otan» partııasy janyndaǵy Sybaılas jemqorlyqqa qarsy is-qımyl boıynsha Respýblıkalyq qoǵamdyq keńestiń tóraǵasy Qaıyrbek Súleımenovtiń, Almaty qalalyq partııa fılıalynyń tóraǵasy, Almaty qalasynyń ákimi Ahmetjan Esimovtiń, jemqorlyqqa qarsy is-qımyl boıynsha óńirlik keńesterdiń jetekshileriniń qatysýymen «Nur Otan» partııasynyń 2015-2025 jyldarǵa arnalǵan Sybaılas jemqorlyqqa qarsy is-qımyl baǵdarlamasyn iske asyrý boıynsha óńirlik keńesterdiń mindetteri týraly» respýblıkalyq semınar-keńes ótti.
«Nur Otan» partııasynyń XVI sezinde Memleket basshysy, partııa Tóraǵasy N.Á.Nazarbaev elimizdi ári qaraı jańǵyrtý úshin «5 ınstıtýttyq reforma» usynǵany málim. Ony iske asyrý úshin «100 naqty qadam – Ult jospary» qabyldandy, ony oryndaý Qazaqstannyń álemdegi eń damyǵan 30 eldiń qataryna qosylýyna múmkindik týǵyzady. Sonymen qatar, atalǵan reformalardy iske asyrý memlekettik apparattaǵy jáne áleýmettik saladaǵy sybaılas jemqorlyqtyń aldyn alýsyz múmkin emes.
Osy oraıda, qoǵamda sybaılas jemqorlyqqa atymen tózbeýshilikti jáne jemqorlyqqa qarsy mádenıetti qalyptastyrýǵa ǵana emes, sondaı-aq, azamattyq qoǵam ınstıtýttarynyń sybaılas jemqorlyqqa qarsy is-qımylǵa qatysýyn zańnamalyq turǵyda qamtamasyz etýdi kózdeıtin «Nur Otan» partııasynyń 2015-2025 jyldarǵa arnalǵan baǵdarlamasy erekshe mańyzǵa ıe bola túsedi.
Semınar-keńeske qatysýshylardyń aldynda sóz sóılegen «Nur Otan» partııasy Tóraǵasynyń birinshi orynbasary Baýyrjan Baıbek qurylǵan kezden bastap «Nur Otan» partııasynyń sybaılas jemqorlyqqa qarsy maqsaty aıqyn turaqty jumys júrgizip kele jatqanyn, al Memleket basshysynyń qatysýymen ótken partııa Saıası keńesiniń keńeıtilgen otyrysynda qabyldanǵan 2015-2025 jyldarǵa arnalǵan baǵdarlamanyń sybaılas jemqorlyqqa qarsy memlekettik strategııanyń ıdeologııalyq ózegine aınalǵanyn atap ótti.
«5 reformany iske asyrý Qazaqstan memlekettiligin nyǵaıtý, lıberaldyq qoǵamdy damytý, «Qazaqstan-2050» Strategııasyn oryndaý, sondaı-aq, jemqorlyqqa jol bermeý men memlekettik apparattyń ashyqtyǵyn arttyrý úshin shynaıy jaǵdaılar týǵyzady.
Sonymen birge, qoǵamnyń belsendi qatysýynsyz, tek memlekettiń kúshimen ǵana sybaılas jemqorlyqpen kúresý tıesili nátıje bermeıdi. Memleket pen qoǵam jemqorlyqqa qarsy biryńǵaı maıdan bolyp qarsy shyǵýy tıis», – dep atap ótti sóılegen sózinde B.Baıbek.
Partııa Tóraǵasynyń birinshi orynbasary Sybaılas jemqorlyqqa qarsy is-qımyl jónindegi qoǵamdyq keńestiń sybaılas jemqorlyq kórinisterin joıý, barlyq memlekettik organdardyń qyzmetin tereń taldaý jáne qoǵamdyq partııalyq baqylaýdy júzege asyrý boıynsha túbegeıli sharalarǵa arnalǵan partııanyń arqaýlyq alańy ekenin basa aıtty.
Sybaılas jemqorlyqqa qarsy is-qımyl jónindegi qoǵamdyq keńesterdiń basshylaryna BPU-nyń sybaılas jemqorlyqqa qarsy qyzmetinde turaqty ádistemelik jáne tájirıbelik kómekti uıymdastyrý tapsyryldy. Jastardyń «Jas Otan» jastar qanatynyń jumysyna erekshe nazar aýdarý qajet, óıtkeni, jastar arasyndaǵy onyń belsendiliginen sybaılas jemqorlyqqa qatysty olardyń kózqarasynyń qandaı bolatyny aıqyndalady.
Partııanyń Jarǵysy men Doktrınasyna sáıkes, búgingi kúni «Nur Otan» partııasy múshesiniń Ádebi kodeksiniń jobasy ázirlendi. Partııa múshesiniń Ádep kodeksiniń basty maqsaty partııa múshesi minez-qulqynyń moraldyq-adamgershilik etalondaryn kúsheıtý, qazaqstandyq patrıotızmdi, partııalyq tártipti nyǵaıtý jáne qoǵam tarapynan partııaǵa degen senimdi joǵarylatý bolyp tabylady. Partııa múshesiniń Ádep kodeksi bastaýysh partııa uıymdaryna talqylaýǵa jiberildi.
Semınar-keńes barysynda «Nur Otan» partııasy janyndaǵy Respýblıkalyq qoǵamdyq keńes tóraǵasy Qaıyrbek Súleımenov sybaılas jemqorlyqqa qarsy is-qımyl boıynsha qoǵamdyq keńesterdiń partııanyń jemqorlyqqa qarsy baǵdarlamasynyń, sondaı-aq, partııa Tóraǵasynyń «Nurly Jol – bolashaqqa bastar jol» Qazaqstan halqyna Joldaýynda baıandalǵan Ulttyq qordan bólinetin qarjynyń jumsalýyn baqylaýdy qamtamasyz etý boıynsha tapsyrmasynyń iske asyrylýyna qatań baqylaý júrgizip otyrǵanyn atap ótti.
Búgingi kúni sybaılas jemqorlyqqa qarsy is-qımyl boıynsha partııanyń jumys isteıtin ınstıtýttary paıda boldy. Sybaılas jemqorlyqqa qarsy baǵdarlamany iske asyrýdyń qadamdyq tetikteri retinde Jol kartasy men is-sharalar jospary bekitildi.
Baǵdarlama sheńberinde «Jemqorlyqsyz el – ósip-órkendegen el» jobasy iske asyrylýda, «Qoǵamdyq baqylaý týraly», «Aqparatqa qoljetimdilik týraly» zań jobalarymen belsendi jumys júrip jatyr, «Sybaılas jemqorlyqqa qarsy is-qımyl týraly» jańa zań jobasyn daıyndaýǵa bastamashylyq jasaldy. Sonymen birge, tuńǵysh ret Qazaqstanda jemqorlyqty qabyldaýdyń jyl saıynǵy ulttyq ındeksin qalyptastyrý úshin ádistemelik arqaý daıyndalýda.
Qanat ESKENDIR,
«Egemen Qazaqstan».
Almaty.
