Elimizdegi býyrqanǵan ındýstrııalyq-ınnovasııalyq damý qozǵalysynan ýaqyttan oza júrý ekpini baıqalatyndaı. Qarap otyrsaq, «Vektor» kombaın zaýyty» seriktestiginiń qurylǵanyna tórt jylǵa aıaq basyp qalypty. Aldymen astyqty óńirde qol jetpeıtindeı kórinetin kombaın shyǵarylady degenge tosyrqaı qaraıtyn dıqan qaýym, «Vektordy» óziniń sheshýshi óndiristik býyny sanaıtyndaı jaǵdaı qalyptasqan qazir. Munda kún sanap jańa tehnıkalar temirjol platformalaryna tıelip, Qazaqstannyń túkpir-túkpirine sapar shegip jatady. Kókshetaýdyń kóshelerimen mań-mań basqan «dala kemelerine» jol berip, qurmet kórsetken jergilikti júrgizýshilerge de rıza bolasyń. Astyqty óńirdiń azamattary osylaı tárbıelengen!
Elge ıgilik qosqan kásiporynnyń Kókshetaýda ashylýy zańdylyq bolmaǵanymen, qajettilik ekendigi aıqyn. Burnaǵy jyldary «Rostselmash» kombaın zaýyty» AAQ Qazaqstan rynogyna jyl saıyn 200-300 kombaın jiberip otyrdy. Árıne, qalta qaǵylatyndaı baǵamen. Respýblıkamyzdyń tıimdi agroónerkásiptik saıasaty bul tehnıkalardy osynda qurastyrý jóninde sheshim alǵany quptarlyq. Nátıje suranystyń tez ótelgendiginde bolyp otyr.
Bastapqyda, 2012 jylǵy astyq oraǵy qarsańynda zaýyt ujymy 18 kombaındy synaqtan ótkizip, «QazAgroQarjy» jelisimen saýdalaı bildi. Kásiporyn mamandary naýqan boıy astyqty alqaptarda bolyp, jergilikti tehnıkanyń júris-turysyn, ónimdiligin jiti baqylaýǵa alǵan. Jetildiriletin tustary da pysyqtalǵan. Osynyń arqasynda, odan keıingi eki jylda Aqmola, Qostanaı, Soltústik Qazaqstan, Qaraǵandy, Pavlodar jáne Shyǵys Qazaqstan oblystarynyń agrarshylaryna 228 dana tehnıka jóneltildi.
– «Vektor-410 KZ» – astyq jınaý kombaındarynyń jańa tolqyny, – deıdi bizben áńgimesinde kásiporyn dırektory Iýrıı Bashýrov. – Munda aýylsharýashylyq mashına qurylysy salasyndaǵy sońǵy jetistikterdiń bári toptastyrylǵan. Ámbebap kombaın 6-7 jáne 9 metrlik shalǵymen jaraqtanyp, kez kelgen alqaptaǵy jumysty sapaly atqarady.
Sondaı-aq, bul mashınalardy naýqan boıy paıdalanyp, astyq, kúnbaǵys, júgeri, raps, ekpe shópterdi jınaýǵa jegýge bolady. Mehanızatorlar úshin qajetti qolaılylyqtar keńinen qarastyrylǵan.
Kásiporyn ozyq ıeıalar sabaqtastyǵyna den qoıady. Búgingi kúni munda «Vektor-410 KZ» astyq kombaındaryn tolyq qurastyratyn kásiporyn qurylysy» ınvestısııalyq jobasy júzege asyrylýda. Integrasııalyq bastama «Bıznestiń jol kartasy-2020» baǵdarlamasy men óńirlik ındýstrııalandyrý kartasyna engizilgen. Bıyl «Rostselmash» AAQ kókshetaýlyq áriptesterine «Vektor» kombaındarynyń barlyq modeldik tizbesin qurastyrý jáne saýda aınalymyna shyǵarý quqyǵyn berip, úlken senim artyp otyr.
Qazir zaýyttyń 2,3 mıllıard teńgege baǵalanǵan qosymsha qurylysy qarqyndy júrip jatyr. Úsh kezeńmen atqarylatyn jobany taǵy da «QazAgroQarjy» qarjylandyrýda.
Búgingi kúni jetildirilgen óndiristik ınfraqurylym, baılanys, jylý, sý jáne elektr qýatymen qamtasyz etetin ınjenerlik júıeler paıdalanýǵa daıyn. Buǵan qosa, kásiporynnyń jeke temirjol tuıyǵyn salý máselesi de sheshimin tappaq. Zaýyt ujymy muny memlekettik qoldaýdyń jemisi dep biledi.
Izdenis ústindegi kásiporyn, osymen bir mezette, «Akros» kombaındary men «Agrosoıýz» pnevmatıkalyq tuqymsepkishterin shyǵarý nıetinde ekendiginen habardar boldyq. Bul úshin eksperımenttik eki dana mashına ákelinip, úlgi boıynsha jumystar bastalypty. Sondaı-aq, jaqyn bolashaqta tirkemeli agregattar úshin «VERSATILE-2375» markaly traktorlardy jelige qosý josparlanǵan. Munyń ózi, ınvestısııalyq joba tolyq qýatyna engen tusta, Kókshetaý zaýyty Qazaqstannyń agroónerkásip salasyn jylyna eki markadaǵy 500-600 dana kombaınmen qamtamasyz etedi degen sóz.
– О́nimdi ótkizý máselesi jan-jaqty oılastyrylǵan, – deıdi Iý.Bashýrov bizdiń kókeıdegi suraǵymyzdy dóp basyp.
Qoldaǵy derekter boıynsha, ótken jylǵy oraq naýqanyna 48 myń astyq jınaý kombaıny qatysqan, munyń 75-80 paıyzy eskirgen tehnıkalar. Onyń ústine, qazirgi tájirıbedegideı, Qazaqstanǵa sheteldik fırmalardan jyl saıyn 1200-1500 dana kombaın jetkize berý múmkin emes. Endeshe bizdiń álemdik standarttardaǵy tehnıkalardy shyǵarýǵa tyrysyp, ishki-syrtqy rynoktaǵy básekelestikke qosylýymyzǵa múmkindik ashylady degen oıdamyz. Konveıerlerdegi jabdyqtar tizbesinde qazaqstandyq úlestiń kóbeıýi baǵa saıasatyna da yqpal etedi. Sondaı-aq, zaýyt ónim sapasyna kepildik berýmen qatar, servıstik júıeniń aýqymyn keńite túsetin bolady.
Baqbergen AMALBEK,
«Egemen Qazaqstan».
Aqmola oblysy.
