Foto: Ashyq derekkóz
«Memlekettik qoldaýdyń bir baǵyty – qaıtarymsyz granttar. 2024 jyly 428 azamat óz bıznes-ıdeıasyn júzege asyrý úshin 400 AEK kóleminde, 1 476 800 teńge grant alǵan. Bıyl da 260 azamatqa osyndaı múmkindik berilmek. Alaıda, osy grant alǵan azamattarǵa monıtorıng júrgizý barasynda 2024 jyly 36 azamat grant qarajatyn nysanaly maqsaty boıynsha paıdalanbaǵandyǵy anyqtalǵan. Qazir olardyń bir bóligi sotqa berilse, ózgelerimen qarajatty qaıtarý jumystary júrgizilýde. Bul – memlekettik qoldaýdyń ashyqtyǵyn baqylaýǵa degen naqty qadam», deıdi basqarma basshysy Janat О́tebaeva.
Qala ákimdiginiń habarlaýynsha, 2025 jyly 22 215 adamǵa ataýly áleýmettik kómek (AÁK) taǵaıyndalǵan. Bul kórsetkish ótken jyldyń sáıkes kezeńimen salystyrǵanda 35,1 paıyzǵa tómendegen, ıaǵnı, jumyspen qamtylǵan azamattar sany artqan.
Sonymen qatar, 1 jastan 6 jasqa deıingi balalarǵa 1,5 AEK (5 538 teńge) kóleminde járdemaqy tólenip jatyr. Qazirgi ýaqytta bul kómek 3 682 otbasydaǵy 7 135 balany qamtyp otyr.
Degenmen, monıtorıng jumystary nátıjesinde AÁK alaýshylar arasynda da zań buzýshylyqtar anyqtalǵan. Ataýly áleýmettik kómek alýshylardyń ishinde 228 otbasynda 381 bala 2022, 2023, 2024 jyldary basqa óńirlerde mektepte nemese bala-baqshada tirkelgendigin anyqtaǵan.
Janat О́mirseıitqyzynyń aıtýynsha, búginde ol otbasylarǵa aqparattyq júıede qaıta esepteý jumystary júrgizilip, ótken úsh jyldyń esebi boıynsha 84,2 mln teńge qaıtarýǵa jatatyny anyqtalǵan. Búgingi tańda 8,8 mln teńge qarjy qaıta esepteý júıesi arqyly bıýdjetke qaıtarylǵan.
«Otbasylyq sıfrlyq kartasy» aqparattyq júıesiniń málimetine sáıkes «D» jáne «E» sanatyndaǵy otbasylardy 2025 jyly 10 paıyzǵa, ıaǵnı 64 525 otbasyǵa tómendetý jospary bekitildi. Aqparattyq júıede 15 sáýirde bul sanattaǵy otbasylar sany 59 293 sanyn qurady. Jyl sońyna deıingi jospar 5 232 otbasyǵa asyryp oryndaldy», deıdi basqarma basshysy.
Búginde Shymkentte 41 970 múgedektigi bar azamat tirkelgen, onyń ishinde 8 099-y – balalar. Olardyń ómir sapasyn arttyrý úshin 14,7 mlrd teńge baǵyttalǵan. Qarajatqa ońaltý quraldary men áleýmettik qyzmetter kórsetilip jatyr.
Aıta keteıik, 2025 jyly qalada jańa nysandar iske qosylady. Atap aıtqanda, Bozaryq shaǵyn aýdanynda 150 oryndyq jańa ońaltý ortalyǵy salynyp jatyr. Sonymen qatar, psıhonevrologııalyq aýytqýy bar balalar men jastarǵa arnalǵan 150 jáne 50 oryndyq eki ortalyq mamyr aıynyń sońyna deıin ashylady.
