Shamamen eki saǵatqa sozylǵan operasııa barysynda búırektiń organdy saqtap qalatyn parsıaldy rezeksııasy jasaldy. Bul — qaterli isikti alyp tastaı otyryp, aǵzanyń qyzmetin saqtap qalýǵa jáne otadan keıingi asqyný qaýpin azaıtýǵa baǵyttalǵan ota.
Operasııany doktor Lı Sıýe Sýn (M.D., Ph.D.) Pekın qalasynan qashyqtan basqardy. Ol zamanaýı telekommýnıkasııalyq tehnologııalardy paıdalana otyryp, hırýrgııalyq prosesti tolyq baqylaýda ustady. Al Almatyda ornalasqan QazOjRǴZI-diń hırýrgi, PhD Hýsan Talıpbaevıch Ýmýrzakov otanyń oryndalýyn qadaǵalady.
Robottandyrylǵan hırýrgııa — ýrologııa, gınekologııa jáne jalpy hırýrgııa salalarynda keńinen qoldanylatyn zamanaýı jáne tıimdi ádisterdiń biri. Bul tásil laparoskopııanyń az ınvazıvtiligi men tinderge mınımaldy zaqym keltirý artyqshylyqtaryn joǵary dáldik, 3D vızýalızasııa jáne ıntellektýaldy basqarý júıelerimen ushtastyrady. Nátıjesinde naýqastyń ońalý merzimi qysqaryp, aýrýhanada jatý ýaqyty azaıady, asqyný qaýpi tómendeıdi.
Aldaǵy aılarda osy júıe arqyly 50 joǵary tehnologııaly operasııa jasaý josparlanyp otyr. Olar ýrologııa, gınekologııa jáne abdomınaldy hırýrgııa salalaryn qamtıdy.
Búgingi tańda Qytaı men Túrkııanyń jetekshi onkologııalyq ortalyqtarymen jasalǵan kelisimder aıasynda isikterdi emdeýdiń ınnovasııalyq ádisterin, onyń ishinde robottandyrylǵan hırýrgııany qoldanatyn birlesken jobalar iske asyrylmaq.
