«AMANAT» partııasy Almaty oblystyq fılıaly janyndaǵy partııalyq baqylaý komıssııasy Qarasaı aýdanyndaǵy mektep qurylysymen tanysty. Komıssııa músheleri Bulaqty jáne Almalybaq aýyldarynda salynyp jatqan jańa bilim oshaqtarynyń qurylys barysyn tekserdi.
«Qarasaı aýdanynda úsh aýysymdy bilim berý máselesi kezeń-kezeńimen sheshilip keledi. Eki jyl buryn munda 12 mektep úsh aýysymda jumys istese, búgingi tańda bul kórsetkish alty ese qysqaryp, tek 2 mektepte ǵana úsh aýysymdy oqý saqtalǵan», – dedi komıssııa tóraǵasy Amangeldi Sembaev.
Onyń aıtýynsha, búgingi tańda aýdanda úsh jańa mekteptiń qurylysy júrip jatyr. Sonyń biri – Bulaqty aýylynda boı kóterip jatqan 900 oryndyq mektep. Nysan «Jaıly mektep» ulttyq jobasy aıasynda salynyp jatyr. Jobanyń jalpy quny – 9,8 mlrd teńge. Qurylys 2025 jyldyń mamyr aıynda aıaqtalady dep josparlanǵan. Qazirgi tańda jumys kóleminiń 90 paıyzy oryndalǵan.
Sondaı-aq Almalybaq aýylyndaǵy 1500 oryndyq mekteptiń qurylys qarqyny da joǵary. Nysan 2025 jyldyń qazan aıynda paıdalanýǵa beriledi. Qurylys jumystaryn «Exclusive Construction» JShS júrgizýde. Qazirgi oryndalý kórsetkishi – 54 paıyz.
«Búgin Bulaqty men Almalybaq aýyldaryndaǵy mektep qurylystaryn qarap shyqtyq. Jumys kestege saı júrip jatyr. Merdigerlerge basty talap – sapa. Partııalyq baqylaýdyń maqsaty – ár jobanyń ýaqytyly ári sapaly oryndalýyn qamtamasyz etý», – dedi «AMANAT» partııasy Almaty oblystyq fılıaly atqarýshy hatshysynyń orynbasary Aslan Kýbentaev.
Budan bólek, «Asyl Arman» turǵyn úı kesheninde 2000 oryndyq mekteptiń qurylysy júrip jatyr. Atalǵan úsh mektep iske qosylǵanda, aýdan boıynsha úsh aýysymdy oqytýdyń túıtkili tolyq sheshiledi dep kútilýde.
Aıta keteıik, ótken jyly Qarasaı aýdanynda 7 jańa mektep paıdalanýǵa berildi. Onyń altaýy – «Jaıly mektep» jobasy negizinde salynǵan nysandar. Naqtyraq aıtqanda, bul mektepter Qaskeleń qalasynda, Qoshmambet, Eltaı, Dolan, Kókózek jáne Kemertoǵan aýyldarynda boı kóterdi.
Partııalyq baqylaý komıssııasy qurylys sapasy men merzimdik kesteni udaıy baqylaýda ustaıtynyn atap ótti.
