Ulttyń uly jyrshysyna aınalǵan, uıat pen ar-namysty bárinen joǵary qoıǵan, joly men salǵan izi bólek aqyn Temirhan Medetbek 80 jasynda bul fánımen qosh aıtysty. Adamgershilik pen ádildik uǵymyn týyndylarynyń negizgi baǵytyna aınaldyrǵan qalamger qazaq rýhanııatyna ólsheýsiz úles qosty. Shyndyqty aıtty, adal júrip, adal turdy.
«Tasqa tamyr bitirý, temirge jan bitirý — bul Qudirettiń ǵana qolynan keledi. Al sondaı Qudiretti óner ıesi — Temirhan Medetbek. Sol sebepti men ony Qudiretti aqyn dep aıtamyn. Temirhan aǵamyzdyń ómirden ótýi — bir úlken mekteptiń, bir dáýirdiń aıaqtalǵany sııaqty. Biraq shynaıy qarasaq, sol mekteptiń shákirtteri bar, sol dáýirdiń oqyrmandary bar. Sondyqtan bul rýhanı jol, bul ádebı baǵyt óz jalǵasyn tabatynyna men senemin», – dedi aqyn, qr eńbek sińirgen qaıratkeri Ulyqbek Esdáýlet.
Túrkistannyń tórinde týyp, Almatyda qyzmettik jolyn jalǵaǵan jazýshy ár jyldary túrli basylymdarda is atqardy. Shyǵarmashylyq ortadan alystamady. Kóp jazdy. Qazaq poezııasyna jańa lep syılady. Oǵan aqynnyń ejelgi tarıhty zertteı otyryp shyǵarǵan «Kók túrikter saryny» atty eńbegi dálel.
«Men Temirhan Medetbekti qazaq poezııasyna tóńkeris jasaǵan, shyn mánindegi revolıýsııa jasaǵan aqyn dep esepteımin. Buǵan dálel — onyń áıgili «Kók túrikter saryny». Bul shyǵarma — tek poetıkalyq týyndy ǵana emes, tutas rýhanı serpilis.
Temirhannyń poezııasyn eki kezeńge bólip qaraýǵa bolady: alǵashqysy — qazaqtyń qara óleńi úlgisinde jazylǵan týyndylary bolsa, ekinshisi — Kúltegin dáýiriniń kóne túrki rýhymen kómkerilgen, tereń tarıhı sanaǵa qurylǵan poezııasy. Menińshe, qazaq adam bolýy úshin — Abaıdy oqýy kerek. Al rýhy myqty, tuǵyry bıik bolýy úshin — Temirhandy oqýy kerek», – dedi jýrnalıst, ońdasynovtanýshy Gúlsim Orazalyqyzy.
Temirhan Medetbek alǵashqy jyr jınaǵyn «Janymnyń jas quraǵy» ataýymen 1970 jyly basyp shyǵardy. Keıin «Janymnyń japyraqtary», «Mártebe», «Daýys», «Meniń Abaıym» syndy eńbekterdiń avtory atandy. О́leńderi álemniń 6 tiline aýdaryldy. Al eń bastysy, onyń ár shyǵarmasynan ór rýh pen erik-jiger jalyny anyq seziledi.
«О́tkir, keshegi Mahambetterdiń izin qýyp kele jatqan myqty aqyndarymyz edi. Sondyqtan biz úshin búgin óte qaıǵyly kún. О́ıtkeni dúnıeden Temirhan Medetbek ótti. Biraq onyń poezııasy, onyń jyrlary, onyń jazǵan esseleri men syn maqalalary qazaqtyń kókeıinde ómir boıy saqtalady», – dedi Qazaqstan Jazýshylar Odaǵynyń basqarma tóraǵasy Mereke Qulkenov.
Aqyn dara jolmen júrýge umtyldy. Kók túrikter sarynyn boıyna sińirip, aqıqatty jyrlady. О́miriniń sońyna deıin qalamyn senimdi serigi etti. О́z isin shyn súıdi. Kópge úlgi boldy.
