Jadyra Ahmetovanyń aıtýynsha, Almatyda reprodýktıvti densaýlyqty qorǵaý – áleýmettik saıasattyń basym baǵytynyń biri. 2025 jyldyń birinshi toqsanyndaǵy málimetter bul baǵytta oń ózgeristerdiń bar ekenin kórsetip otyr. Otbasyn josparlaý, medısınalyq tekserý jáne jastarmen profılaktıkalyq jumys júrgizý salalarynda aıtarlyqtaı ilgerileý baıqalǵan.
«Reprodýktıvti densaýlyqty qorǵaý – Almatynyń áleýmettik saıasatyndaǵy eń mańyzdy sala. 2025 jylǵy birinshi toqsandaǵy málimetke qaraǵanda, otbasyn josparlaý, dárigerge qaralý men jastarmen jumys isteý máselesinde úlken ilgerileý bary baıqaldy», dedi Jadyra Ahmetova.
Onyń aıtýynsha, 2025 jyldyń 1 sáýirindegi jaǵdaı boıynsha Almaty qalasynyń turǵyndar sany 2 348 096 adamǵa jetken. Bul 2023 jyldyń osy merzimimen salystyrǵanda 5,6%-ǵa, 2024 jylmen salystyrǵanda 2,5%-ǵa ósim bar ekenin kórsetedi. Balalar sany 2,5%-ǵa, al jasóspirimder qatary birden 18%-ǵa artqan.
Bala týýǵa daıyndyq máselesine de erekshe nazar aýdarylyp otyr. Jadyra Ahmetova keltirgen derekke sáıkes, bosanýǵa daıyndyq kórsetkishi 2024 jyly 19,1% bolsa, 2025 jyly bul kórsetkish 50,8%-ǵa jetken. Iаǵnı, áıelder arasynda profılaktıkalyq tekserýden ótý men medısınalyq saýattylyq deńgeıi aıtarlyqtaı artyp keledi.
«Pregravıdarlyq daıyndyqpen qamtýdyń artýy – analar men balalardyń densaýlyǵyna tónetin qaýip-qaterdi azaıtýǵa septigi tıetin mańyzdy qadam. Bul jańa tásilderdiń sátimen engizilip, medısınalyq qyzmet kórsetýdi uıymdastyrýdyń jaqsarǵanyn, sondaı-aq áıelderdiń aqparattaný deńgeıiniń artqanyn dáleldeıdi», dedi bólim basshysy.
Sonymen qatar, qaladaǵy Jastar densaýlyq ortalyqtarynyń (JDO) jumysy jandanyp keledi. Bul ortalyqtar jasóspirimder men jastarǵa medısınalyq jáne psıhoáleýmettik qoldaý kórsetetin mamandandyrylǵan mekemeler. Búginde Almatyda 14 JDO jumys isteıdi. 2025 jyldyń birinshi toqsanynda bul ortalyqtarǵa 25 myńnan astam adam júgingen. Bul kórsetkish 2024 jyldyń sáıkes merzimimen salystyrǵanda 66%-ǵa joǵary.
Kelýshilerdiń basym kópshiligi psıhologqa (8627), terapevtke (6063), gınekologqa (5745) jáne ýrologqa (2225) júgingen. Bul jastar arasynda psıhologııalyq jáne reprodýktıvti qoldaý suranysynyń joǵary ekenin kórsetedi.
Qazirgi ýaqytta JDO-larda 98 maman qyzmet etedi. Olardyń 60%-y reprodýktıvti jáne psıhıkalyq densaýlyq máseleleri boıynsha arnaıy sertıfıkattarǵa ıe. Bul kórsetkish Densaýlyq saqtaý mınıstrligi bekitken standarttarǵa tolyq sáıkes keledi.
«Almatyda reprodýktıvti densaýlyqty qorǵaýǵa baǵyttalǵan bastamalar medısınalyq kómekti ǵana emes, sonymen birge bilim berý, aǵartý men psıhoáleýmettik qoldaýdy da qamtıdy. Mundaı qadamdar halyq densaýlyǵyn nyǵaıtýǵa, ata-ana mádenıetin qalyptastyryp, qala turǵyndarynyń ómir sapasyn arttyrýǵa yqpal etedi», – dep túıindedi Jadyra Ahmetova.
