Foto: dairynews.today
Buǵan kóktemgi aýa raıynyń jyly bolýy áser etken. Osy egin maýsymynda topyraq ylǵaldyǵyly jetkiliksiz bolǵandyqtan, ońtústik óńirlerde egistikterdiń sý tutynýy 50 paıyzǵa artqan. Mınıstr bul jaǵdaı sýarý kózderine qosymsha aýyrtpalyq túsiretinin aıtty
«Qazaqstandaǵy jalpy sý tutynýdyń 60%-dan astamy aýyl sharýashylyǵyna tıesili. Jyl saıyn sýarý úshin paıdalanylatyn 12 tekshe metr sýdyń 98%-y ońtústik bes aımaqta tutynylady», dedi Nurjan Nurjigitov.
Mınıstr keltirgen derekke saı 1 sáýirdegi jaǵdaı boıynsha ońtústik óńirlerdiń sý qoımalarynda 26 mlrd tekshe metr sý jınalǵan. Bul ótken jyldyń sáıkes kezeńimen salystyrǵanda 171 mln tekshe metrge az.
Osyǵan baılanysty Úkimet basshysy aýyl sharýashylyǵyna sý únemdeý tehnologııalaryn engizý jumysyn jandandyrýdy tapsyrdy.
Oljas Bektenov klımattyq syn-qaterlerdiń kúsheıýi men qoljetimdi sý qorlarynyń qysqarýy jaǵdaıynda dıqandardy qajetti sý resýrstarymen qamtamasyz etýge júıeli tásil qajettigine nazar aýdardy.
«Ylǵaldy kóp talap etetin daqyldarǵa táýeldilikti azaıtý sharalaryn qabyldaý, ǵylymı ınstıtýttardy jumyldyra otyryp, sharýalardyń qurǵaqshylyqqa tózimdi agrotehnologııalarǵa kóshýi boıynsha jer-jerde túsindirý jumystaryn jandandyrý kerek.
Degenmen, aýa raıynyń yqtımal qolaısyz bolýy bolashaq eginniń sapasy men kólemine áser etpeýi kerek. Tıisti sharalardy aldyn ala qabyldaý qajet», dedi Oljas Bektenov.
Premer-mınıstr Sý resýrstary jáne ırrıgasııa mınıstrligine Qarjy mınıstrligi, oblys ákimdikterimen birlesip, sý tapshylyǵy qaýpi joǵary óńirlerdi basym tártippen qarjylandyrýdy jáne dıqandardyń tamshylatyp jáne jańbyrlatyp sýarýǵa kóshýin yntalandyrý jónindegi sharalar keshenin kózdeı otyryp, aýyl sharýashylyǵyna sý únemdeý tehnologııalaryn engizý jumysyn jandandyrýdy tapsyrdy.
