«Al súzgisine belsendirilgen kómirdi paıdalanýdy uıǵardym. Bul qurylǵyny zerthanalardaǵy sorǵy shkaftarda qoldanýǵa bolady. О́ıtkeni, hımııalyq zertteý júrgizý kezinde qurylǵy ýly gazdyń 60 paıyzyn tutyp qalady», deıdi N.Kenjebaı.
Qazir ol munaı jáne gazdy qaıta óńdeý tehnologııasy mamandyǵynda oqıdy. Zertteý kezinde jańa qurylǵy belsendirilgen kómirdiń ýly gazyn jaqsy sińiretinin anyqtapty.
«Kómirdi mataǵa salyp óńdedim. Bul ıdeıany zertteýge 2-3 apta, al súzgisin daıyndaýǵa úsh aı jumsadym. Bolashaqta osy zertteýimdi jalǵastyrǵym keledi», deıdi Nurdáýlet Kenjebaı.
Al esepteý tehnıkasy jáne aqparattyq jeliler mamandyǵynda bilim alyp júrgen Shadııar Jandarbek, Nurıslam О́tepbergen, Damır Qadyrǵalı men Artýr О́mirǵalı jańa qosymsha jasap shyǵardy. Qosymshaǵa «NeXa» ataýyn beripti. Onda bes baǵytty qamtyǵan test tapsyrmalary júktelgen.
«Qosymsha – beıimdelgen kýrs bazasy bar bilim berý platformasy. Osy arqyly bilim alýshylar óz deńgeıin tekserýine bolady. Ázirge test tapsyrmalary orys tilinde júkteldi. Aldaǵy ýaqytta qazaq jáne aǵylshyn tilindegi nusqasy qosylady. Test tapsyrmalarynyń baǵytyn kóbeıtemiz», deıdi avtordyń biri Sh.Jandarbek.
Jańashyl stýdent byltyrǵy jeltoqsanda «Táýelsizdik urpaqtary» jobasynda «Aqparattyq tehnologııa» baǵyty boıynsha jeńimpaz atanǵan.
Atyraý oblysy
