Egis alqabynda ótken «Dala kúni» semınar-keńesinde tıisti mekemeler men sharýashylyq basshylary saladaǵy ózekti máselelerdi baıan etti. Byltyr elimizde dıqandarǵa kóktemgi egis, kúzgi jıyn-terim jumystaryna 5 paıyzben beriletin jeńildetilgen nesıe kólemi alǵash ret 500 mlrd teńgeden assa, bıyl bul qarajat 700 mlrd teńge bolypty. Dıqandarǵa «Keń dala-2» baǵdarlamasy arqyly qoldaý kórsetilip otyr. Nesıeniń 85 paıyzyn «Damý» kásipkerlikti qoldaý qory, tek 15 paıyzyn sharýashylyqtar kepildendiredi.
Aldyńǵy jyldary kóktemgi jáne kúzgi dala jumystaryn qarjylandyrýǵa «Agrarlyq nesıe korporasııasy» nebári 2-3 mlrd teńge bólip kelse, bıyl qarjy kólemi toǵyz ese artyp, 18 mlrd 500 mln teńgege jetken. Odan bólek, aýyl sharýashylyǵy salasyn ártaraptandyrýdaǵy iri ınvestısııalyq jobalardy qarjylandyrýda Soltústik Qazaqstan oblysy tájirıbesi negizinde jeńildetilgen nesıelendirý baǵdarlamasy júzege asyrylady.
Tapshylyqqa urynbaý úshin bıyl oblysta sý únemdeý tehnologııalaryn paıdalaný kólemin 9 200 gektarǵa jetkizip, byltyrǵydan 2 ese arttyrý mejelengen. Bul baǵytta da memlekettik qoldaý sharalary bar. Jabdyqtardy satyp alýǵa jáne qurýǵa ketken shyǵynnyń 80 paıyzyna deıin memleket tarapynan sýbsıdııalanady.
Sonymen bıyl óńirde 193 700 gektarǵa aýyl sharýashylyǵy daqyldary egiledi, onyń 85,9 myń gektary – kúrishtik alqaptar. Maıly jáne malazyqtyq daqyldar aýmaǵy da ótken jylǵa qaraǵanda 3 400 gektarǵa artady.
Bıylǵy taǵy bir erekshelik – jergilikti sharýalar dán sebýde jańa tehnologııaǵa den qoıyp otyr. Agrodrondar tuqymmen qatar tyńaıtqyshty da tegis seýip, eńbek ónimdiligin arttyrýǵa múmkindik beredi. Osyndaı jańalyq engizip otyrǵan Shıeli aýdanyndaǵy «Bıdaıkól» sharýa qojalyǵy 10 gektar aýmaqqa kúrishti kóshettep egý ádisin de qolǵa alypty. Bul sý shyǵynyn 20%-ǵa, dán sebý normasyn 80%-ǵa únemdep, ónimdilikti joǵarylatýǵa sep bolmaq.
«О́nimdi jaqsartý baǵytynda damyǵan elderdiń tehnologııalaryn alyp, yńǵaıymyzǵa qaraı paıdalaný múmkindigin synap jatyrmyz. Osyǵan deıin deltaplan paıdalanyp keldik, bıikteý ushatyndyqtan onyń sepken dárisi aýaǵa ushyp ketetin. Al 2-3 metr bıiktegi dronnan sebilgen dán de, dári de ysyrap bolmaıdy», deıdi sharýashylyq tóraǵasy Talǵat Baıdalıev.
Bıyl oblystyń egistik alqaptarynda kúrishtiń 30-dan astam jańa sorty synaqtan ótedi. Olardyń qatarynda Qytaı, Túrkııa jáne Eýropa elderinen ákelinip, alǵash ret jersindiriletin tuqym túrleri de bar.
«Qazir sharýalardyń lazerlik tegistegish tehnıkalardyń tıimdiligine kózderi jetti. Osy kúni óńirde 200-den astam tegistegish bar. Bıyl 60 myń gektar jer osyndaı ádispen tegisteledi. Qytaılyq áriptestermen jasalǵan kelisim aıasynda 6 sortty shaǵyn kólemde synaqtan ótkizemiz. Eýropadan da, Túrkııadan da sorttar alyp synap, keleshekte sol sorttardyń arasynan tıimdisin alqapqa egemiz», deıdi oblystyq aýyl sharýashylyǵy jáne jer qatynastary basqarmasynyń basshysy Talǵat Dúısebaev.
Qyzylorda
