Senat Komıtetiniń tóraǵasy Nurlan Beknazarov óz sózinde qoǵamnyń sot tóreligine qoıatyn talaby kún saıyn artyp kele jatqanyn atap ótti. Onyń aıtýynsha, sot júıesiniń turaqty damýy, onyń ashyqtyǵy men ádilettiligin qamtamasyz etý – quqyqtyq memlekettiń negizgi sharttarynyń biri.
«Sot ákimshiligi sot tóreligin tikeleı júzege asyrmaıdy, biraq oǵan qajet barlyq jaǵdaıdy jasaıdy – kadrdan bastap ınfraqurylymǵa, sıfrlyq platformalar men beınebaılanys júıelerine deıin. Sondyqtan bul qurylym sýdıalardyń táýelsizdigin qamtamasyz etýde jáne sot júıesiniń turaqty damýyn qoldaýda taptyrmas tetik bolyp otyr», dedi komıtet tóraǵasy.
Otyrysta sóz alǵan Sot ákimshiliginiń basshysy Naıl Ahmedzakırov qatysýshylarǵa 2025–2029 jyldarǵa arnalǵan Sot ákimshiligin damytý strategııasynyń negizgi baǵyttary jóninde baıandap, jańa mindettermen tanystyrdy.
Kezdesý barysynda qatysýshylar sottardyń uıymdastyrýshylyq jumysyn zamanaýı talaptarǵa saı jetildirý joldaryn talqylap, ashyqtyqty qamtamasyz etýde sıfrlyq sheshimderdiń mańyzyna toqtaldy.
Otyrys qorytyndysy boıynsha Senat depýtattary sot ákimshiliginiń turaqty damýyn zańnamalyq jáne qarjylyq turǵyda qoldaýdyń mańyzdylyǵyn atap ótti. Sıfrlyq transformasııa men sot júıesiniń táýelsizdigin nyǵaıtý baǵytyndaǵy jumystar – ádiletti qoǵam qurý jolyndaǵy sheshýshi qadam ekeni aıtyldy.
