Aqtaý qalasynda etnomádenı birlestikter «Meniń Qazaqstanym» dep atalatyn oblystyq baıqaýǵa qatysyp, qazaq tilinde án aıtyp, ulttyq aspaptarda oınaýdan, kúı tartýdan saıysqa tústi.
Bul baıqaý – «Assambleıa jyly» aıasynda Mańǵystaýda ótetin sharalardyń biri. Aldymen memlekettik tilde óner saıysyna túsken ózge ult ókilderi aldaǵy ýaqytta Qazaqstanda turatyn barlyq ulttardyń tilinde án aıtyp, ulttyq aspaptarynda oınaýdan jarysqa túspek.
Aımaqta turatyn ult ókilderin yntymaqtastyqqa, aýyzbirshilikke uıyta túsý, memlekettik til men ulttyq ónerimizdi damytý jáne ultaralyq mádenıetti boılaryna sińirý maqsatynda Mańǵystaý oblystyq mádenıet basqarmasy men Mańǵystaý oblysyndaǵy Qazaqstan halqy Assambleıasy hatshylyǵy uıymdastyrǵan baıqaýǵa Aqtaýdaǵy barlyq etnomádenı birlestikter atsalysty.
Baıqaýda ýkraıny, orysy, tatary men bashqurty, belorýsy bar ókilder qazaq tilinde «sahnanyń sánin keltirdi». Belgili sazgerlerimizdiń ánderi shyrqalyp, dombyradan qazaqtyń kúıleri kúmbirledi. Mysaly, ýkraındar M.Omarovtyń «Anashym» ánin, E.Hasanǵalıevtiń «Baıanaýyl» ánin, M.Jagorqyzynyń «Dýdar-aı» ánin oryndasa, orystar N.Tilendıevtiń «Saǵynar júregin», M.О́skenbaevtyń «Jeńis» jáne O.Dúısenovtiń «Baldyrǵan» kúılerin, al tatarlar O.Áýbákirovtiń sózine jazylǵan Á.Beıseýovtiń «Muńaıma» ánin, Abaıdyń «Kózimniń qarasy» ánderin shyrqady. Qazaq tilinde jeke nemese hormen án shyrqap, aspapta oryndaýda birinen-biri asyp túsýge tyrysqandardan daǵystan ultynyń ókilderi de qalǵan joq. Olar óz kezeginde halyq áni «Bir balamen» kórermen qoshemetine bólendi, al belorýstardyń tańdaýy Sh.Sarıevtiń sózine jazylǵan B.Oralulynyń «Bozjorǵa» ánine túsipti.
Qazaqstandy ortaq shańyraq etip, onyń aıasynda tatý-tátti ómir súrip jatqan birneshe ult urpaqtarynyń jas-kári demeı qazaq tilinde án shyrqaýy, dombyrada kúı tartýy bizdi qýantty. Qazaq halqynyń belgili sazgerleri men aqyndarynyń shyǵarmalary birinen soń biri oryndalyp jatty. Bul saıysta júırikterdi tańdaý ońaıǵa túsken joq, alaıda, «myńnan tulpar» shyǵar sheberlerdi anyqtaýǵa tyrystyq. Biraq, eń bastysy, qazaq óneri, qazaq tili ardaqtalǵan kesh boldy, táýelsiz Otanymyzdy meken etken birneshe ult ókiliniń dostyǵy qýantty, deıdi qazylar alqasynyń múshesi, ánshi Salıhat Qudysova.
О́ner saıysynda hor, vokal, solo, ulttyq aspapta oryndaý atalymdary boıynsha anyqtalǵan jeńimpazdar syı-sııapattarǵa ıe boldy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
Sýretti túsirgen
Serik MAIEMEROV.
