«Syr juldyzdary» dep atalatyn ortalyqtyń paıdalanýǵa berilýine oraı uıymdastyrylǵan saltanatty is-sharaǵa Oqý-aǵartý mınıstri Ǵanı Beısembaev, Parlament Májilisiniń depýtattary Murat Ábenov, Murat Ergeshbaev, Marhabat Jaıymbetov jáne zııaly qaýym ókilderi qatysty. Oblys ákimi Nurlybek Nálibaev jurtshylyqty jańa nysannyń ashylýymen quttyqtap, bilim salasynda atqarylǵan jumystarǵa toqtaldy.
«О́ńirde sapaly bilim, sanaly tárbıe berýde júıeli jumys bar. Keıingi úsh jylda bilim salasyna bólingen qarjy kólemi 32 paıyzǵa artyp, 304 mlrd 600 mln teńgege jetti. Aldymyzda turǵan birinshi mindet – balalardyń bilim alýyna qolaıly jaǵdaı jasap, jaıly orta qalyptastyrý. Osy baǵytta bilim oshaǵyna syımaı, úsh aýysymdyq júıemen oqytýǵa májbúr bolǵan qaladaǵy 4 mektep janynan 2023 jyly 1 850 oryndyq qosymsha qurylys salyp, máseleni túbegeıli sheshtik. Jańa nysandardyń ashylýy jańa dáýirde básekege qabiletti ulandarymyzǵa jańa múmkindikter syılaý. Egemen elimizdi órkendetýdegi, óskeleń urpaqty tárbıeleýdegi óreli bastamalarymyz tabysty bolsyn», dedi oblys basshysy.
Jıynda Oqý-aǵartý mınıstri Ǵanı Beısembaev, Parlament Májilisiniń depýtaty Murat Ábenov jurtshylyqty quttyqtap, ǵımaratty salǵan «BI Global» JShS qurylysshylary marapat tórinen kórindi.
Qaladaǵy keń kósheniń boıynan oryn tepken shyǵarmashylyq-ınnovasııalyq akademııa táýligine 3 myń oqýshyǵa deıin qabyldaıdy. Munda basseın, toptyq jattyǵý bólmesi, kórkem gımnastıka jáne fıtnes zaly ornalasqan. Sondaı-aq ústel oıyndaryna arnalǵan kabınet, jekpe-jek, ústel tennısi zaldary bar.
Kórkemdik-estetıkalyq baǵytta keskindeme, sýret salý, rezın art bólmesi, balalar shyǵarmashylyǵy sheberhanasy, sándik-qoldanbaly óner, «FabLab», dybys jazý stýdııasy, robottehnıka jáne jasandy ıntellekt, bıotehnologııa, 3D modeldeý, KIP jáne avtomattandyrý, kıbersport jáne matematıka kabınetteri jumys isteıdi.
О́tken jyly óńirde bilim berý ınfraqurylymyn damytý baǵytyndaǵy jumys nátıjesinde 13 ǵımarat paıdalanýǵa berilgen. Al «Jaıly mektep» ulttyq jobasy aıasynda 10 mekteptiń qurylysy josparlansa, búginde 3 myń oryndyq 6 mektep ashyldy. Qalǵan tórteýi jyl sońyna deıin qoldanysqa beriledi. Qalanyń sol jaǵalaýynan boı kóterip kele jatqan fızıka-matematıka mektep-ınternaty men mýzykalyq kolledj ǵımaraty salaǵa jasalyp jatqan qoldaýdyń nátıjesi deýge bolady.
Keıingi úsh jylda 3 oqýshylar saraıy men 2 óner mektebi iske qosylyp, shákirtterdiń jan-jaqty qalyptasýyna qyzmet etip keledi.
Qyzylorda
