Jeńistiń 80 jyldyǵyn qaraýyltóbelikter uıymshyldyqpen atap ótti. Mereke qarsańynda aýyldy abattandyrýǵa, «Zerde» saıabaǵyn jańartýǵa, jeńis meıramyn laıyqty atap ótýge aýyldastar 7 mln 150 myń teńge qarajat jınapty. Demeýshilerdiń bir toby «Týǵan ólkem – Qaraýyltóbe» arhıtektýralyq nysanyn ornatsa, endi bir toby aýylǵa kire beristegi qaqpany jańartqan. Tipti aıaldama janyna jańa ájethana ornatylyp, kópshiliktiń bir qajeti túgendelgen.
– Aýyldaǵy kórneki taqtalardy da talapqa saı jańarttyq. Qazir aýyl kóshelerinde tazalyq, ulttyq qundylyqtarymyz, eńbekqorlyq, el birligi, otbasy tárbıesi týraly onshaqty banner iline bastady. Bul is te tolyǵymen Almas О́tejanov, Asylhan Shaıhıev, Mereke Tursynǵalıev sekildi azamattardyń qoldaýymen júzege asty. Ár bastamaǵa qol ushyn sozýǵa daıyn azamattar az emes. Sondaı jandardyń arqasynda soǵys jáne tyl ardagerleriniń sýretteri ilingen taqta jańartyldy, aýylda dala qyzyqtary uıymdastyrylyp, qos kıiz úı tigilip, as berildi, – deıdi aýyldyq okrýgtiń ákimi Jánibek Ábirov.
Surapyl soǵys jyldary Qaraýyltóbe aýylynan 400-ge jýyq azamat maıdanǵa attansa, elge tek 151-i aman oralǵan eken. Sol maıdangerdiń biri – fın jáne Ekinshi dúnıejúzilik soǵysqa qatysqan, keıin aýylda eńbek etken marqum Qamesh Ábiruly bolatyn. Batyrdan taraǵan urpaq búginde úlken áýletke aınalǵan. Olar jeńis kúni qarsańynda at shaptyrym jerge jańa baq ornatyp, oǵan «Jeńis baǵy» degen ataq berdi.
Aýylda budan basqa da ıgi is kóp. Jaqynda qos páterli úı salý qolǵa alyndy. Budan bólek, «áleýmettik keńse» dep atalatyn ǵımarattyń da qabyrǵasy tiktelip, shatyry jabyla bastapty. Okrýg basshysynyń aıtýynsha, keńse ashylǵan soń aýyl turǵyndary kez kelgen qujat úshin aýdan ortalyǵyna shapqylamaı, osy jerden sharýasyn bitiredi eken. Elektrondy úkimet, taǵy sol sııaqty portaldar arqyly memlekettik qyzmet alýǵa, bank qyzmetine qoljetimdi ortalyq bolmaq. Eki nysan da shilde aıynda paıdalanýǵa berilmek.
Batys Qazaqstan oblysy
