Foto: Ashyq derekkózden
Kompanııa Astana áýejaıyn qarjylandyrýdy bir jyldyq jiti tekserýden keıin sheshken. Keshendi taldaý kezinde áýejaıdyń qazirgi ýaqyttaǵy jaı-kúıin egjeı-tegjeıli saraptalyp, áýejaıdyń 2023 jylǵy 14 mlrd teńgeden astam shyǵyny bar ekeni anyqtalǵan.
Terminals Astana Airport Limited kompanııasy ózderi basqarǵan 1 jylda (2024) áýejaı 790 mıllıon teńge kiriske qol jetkizgenin málimdedi.
«Jolaýshylar aǵyny 2023 jyly jylyna 7,5 mıllıon jolaýshydan 2024 jyly 8,3 mıllıon jolaýshyǵa deıin ósti. 2024 jyly júrgizilgen taldaý nátıjeleri men jobanyń bolashaǵyn aıqyndaǵan alǵashqy tabystarǵa súıene otyryp, biz Astana áýejaıyn damytýǵa baǵyttalǵan keshendi baǵdarlamany júzege asyrý týraly sheshim qabyldadyq. Baǵdarlama aıasynda tikeleı ınvestısııa kólemi 153 mıllıard teńgeni quraıdy. Sonymen qatar, aldaǵy 25 jyl ishinde úshinshi taraptardan 393 mıllıard teńgege deıin janama ınvestısııalar tartý kózdelip otyr. Bul qarajat ınfraqurylymdy aýqymdy túrde keńeıtýge baǵyttalady», delingen kompanııa habarlamasynda.
Qarajat qaıda ınvestısııalanady?
Qarajat halyqaralyq qaýipsizdik jáne tıimdilik standarttaryna sáıkes keletin uzyndyǵy 3,5 km quraıtyn jańa (qosymsha) ushý-qoný jolaǵynyń qurylysyna jumsalmaq. Jańa ushý-qoný jolaǵy áýejaıdyń ótkizý qabiletin aıtarlyqtaı arttyryp, ushyp-qoný operasııalaryn qatar júrgizý múmkindigin qamtamasyz etedi.
Kompanııa áýejaıdyń ótkizý qabiletin 2033 jylǵa qaraı jylyna 15 mıllıon jolaýshyǵa deıin jáne 2053 jylǵa qaraı 30 mıllıon jolaýshyǵa deıin arttyrýǵa múmkindik beretin qoldanystaǵy T2 jolaýshylar termınalyn keńeıtip, jańa halyqaralyq T3 termınalynyń qurylysyn bastaýdy josparlar otyr.
2053 jylǵa qaraı júk aınalymyn qazirgi maksımým 12 000 tonnadan 130 000 tonnaǵa deıin ulǵaıtý maqsatynda júk termınaly da jańǵyrtylyp, onyń ishinde qoıma keńistigi keńeıtilip, zamanaýı logıstıkalyq tehnologııalar engiziledi.
Sany artyp jatqan reısterge úzdiksiz qyzmet kórsetý maqsatynda janar-jaǵarmaı quıý kesheniniń aýmaǵy 5,2-den 11,6 gektarǵa deıin ulǵaıtylady.
«Investısııalyq baǵdarlamamyzda qonaq úı keshenderin, iskerlik jáne saýda ortalyqtaryn, sondaı-aq zamanaýı kórmeler men konferens-zaldardy qamtıtyn Aero City ınnovasııalyq kópfýnksıonaldy klasterin qurýǵa erekshe kóńil bólinedi. Aero City jobasy áýejaıdyń tartymdylyǵyn arttyryp qana qoımaı, jańa jumys oryndaryn ashyp, búkil aımaqtyń ekonomıkalyq damýynyń katalızatoryna aınalady. Sonymen qatar, bul joba úshinshi taraptardan qosymsha ınvestısııalar tartýǵa jáne jergilikti ekonomıkanyń ósýine yqpal etedi.Barlyq ınvestısııalar Qazaqstannyń memlekettik bıýdjetiniń qarajatyn paıdalanbaı júzege asyrylatynyn erekshe atap ótken jón», delingen mınıstrlik habarlamasynda.
Negizgi ınfraqurylymǵa menshik quqyǵy «Nursultan Nazarbaev halyqaralyq áýejaıy» AQ-da qalady, al memleket bıýdjetke turaqty kiristerdi alýdy jalǵastyrady.
Áýejaıdyń barlyq qyzmetkerleri kepildendirilgen turaqty jumysqa ornalasý arqyly óz jumystaryn jalǵastyrady, sonymen qatar qyzmetkerlerdi oqytý jáne biliktiligin arttyrý boıynsha arnaıy bastamalar da bar.
