Bul – Gonkongtyń CityU (City University of Hong Kong) ýnıversıtetine qarasty CityU Zertteý jáne ınnovasııalar ınstıtýtynyń (CityUHK Institute of Research and Innovation – CIRI) fılıaly. Atalǵan fılıal Sátbaev ýnıversıteti bazasynda ashyldy.
CityU – álemdegi eń jyldam damyp kele jatqan jas ǵylymı-zertteý ýnıversıtetteriniń biri. Ol az ǵana ýaqyt ishinde QS reıtıngi boıynsha 62-orynǵa, al Times Higher Education tizimi boıynsha 78-orynǵa shyqty. Stenford ýnıversıtetiniń málimetinshe, CityU-dyń 170-ten astam oqytýshysy álemdegi eń kóp dáıeksóz keltirilgen ǵalymdardyń top-2% qataryna kiredi.
Instıtýttyń resmı ashylý saltanatyna Ǵylym jáne joǵary bilim vıse-mınıstri Dınara Sheglova, Almaty qalasy ákiminiń orynbasary Azamat Qaldybekov, QHR-nyń bas konsýly Szıan Veı jáne basqa da resmı tulǵalar qatysty.
Jıynda sóz alǵan Ǵylym jáne joǵary bilim vıse-mınıstri Dınara Sheglova: «Bul Qazaqstannyń joǵary bilim berý júıesi úshin shyn máninde mańyzdy oqıǵa boldy. City University of Hong Kong ýnıversıteti sııaqty bedeldi ýnıversıtettiń fılıalyn ashý bizge joǵary bilikti kadrlardy daıarlaýǵa ǵana emes, ǵylym men ozyq zertteýlerdi birlesip damytýǵa da múmkindik beredi. Bul yntymaqtastyq qarym-qatynas eki el arasyndaǵy berik kópirge aınalatynyna jáne qazaqstandyq bilim berý júıesin jańa, halyqaralyq deńgeıge shyǵarýǵa yqpal etetinine senimdimin», dedi.
Al Sátbaev ýnıversıtetiniń rektory Meıram Begentaev: «Sheteldik ýnıversıtet fılıalynyń Sátbaev ýnıversıtetinde ashylýy — Ǵylym jáne joǵary bilim mınıstrliginiń Qazaqstanda bilim men ǵylym sapasyn arttyrýǵa baǵyttalǵan aýqymdy baǵdarlamasynyń bir bóligi. Memlekettik qoldaýdyń arqasynda qazaqstandyq stýdentter CityU syndy álemdik deńgeıdegi ǵylymı ortalyqtarda joǵary sapaly bilim alýǵa múmkindik alyp otyr», dedi.
Ekinshi taraptan sóılegen CityU Dırektorlar keńesiniń tóraǵasy Maıkl Ngaı: «Búgin biz tek fılıal ashyp qana qoımaı, jahandyq deńgeıde oılaıtyn kóshbasshylar men jańashyl ǵalymdardy daıarlaýǵa negiz qaladyq. Olar adamzattyń ózekti máselelerin sheshýge úles qosyp, Qazaqstan men Gonkongtyń, sondaı-aq búkil álem qaýymdastyǵynyń órkendeýine qyzmet etedi», dedi.
Dál osy kúni CityU men Sátbaev ýnıversıteti arasynda PhD deńgeıindegi qos dıplomdy bilim berý baǵdarlamasyn iske qosý týraly memorandýmǵa qol qoıyldy. Bul – qazaqstandyq ýnıversıtet pen álemniń TOP-100 ýnıversıtetteri qataryna kiretin bedeldi joǵary oqý orny arasynda jasalǵan alǵashqy kelisim.
Eki ýnıversıtet arasynda osyǵan deıin qol qoıylǵan strategııalyq seriktestik kelisimge sáıkes Materıaltaný (Material Science), Jasandy ıntellekt, Kompıýterlik ǵylymdar (Computer Science) jáne Azamattyq qurylys (Civil Engineering) mamandyqtaryna baǵyttalǵan qos dıplomdy bilim berý baǵdarlamalary iske qosyldy, bakalavrıatta oqý «2+2» jáne magıstratýrada oqý «1+1» formaty boıynsha ótedi.
Fılıaldaǵy oqý stýdentterge Ǵylym jáne joǵary bilim mınıstrliginiń memlekettik granty negizinde tolyqtaı aǵylshyn tilinde bilim alýǵa múmkindik beredi. Bakalavrlar alǵashqy 2 oqý jylyn Almatyda ótkizse, sońǵy 2 jyldy Gonkongta ótkizedi. Al PhD baǵdarlamasynyń qatysýshylary Gonkongtaǵy oqý barysynda álemdik ǵylymı zerthanalarda jetekshi ǵylymı toptarmen birge taǵylymdamadan ótedi.
