Sonymen 2025 jyly 16-18 mamyr aralyǵynda Qytaı memleketindegi FTC (FIRST Tech Challenge) jarysy – 5-shi SaoLý kýbogy: Jasóspirimderge arnalǵan robot jobalaý jáne qurastyrýdan uıymdastyrylǵan chempıonatyna Jetisý oblysyndaǵy Daryndy balalarǵa arnalǵan Jylandy mamandandyrylǵan lıseı-ınternatynyń WATER7 komandasy Connect Award marapatyn ıelendi. Bul – jasóspirimderdiń shyǵarmashylyǵy men tehnıkalyq qabiletterin álemdik deńgeıde tanytýǵa berilgen tamasha múmkindik bolatyn. Bul – aýyldan shyqqan jas daryndardyń ǵylym men tehnıka álemindegi zor jetistigi.
Al osy jeńistiń artynda – aýyl mektebiniń oqýshylaryn halyqaralyq deńgeıge kóterip júrgen erekshe maman, robototehnıka jattyqtyrýshysy Aıdos Ordabaevty bóle-jaryp atap ótken jón. О́z mamandyǵynyń bilgiri lıseı-ınternatyna arnaıy shaqyrtýmen kelip, bir jyldyń ishinde Jylandy mektebinde robototehnıka baǵytyn jańa beleske kóterdi. Nátıjesinde oqýshylar respýblıkalyq jáne halyqaralyq deńgeıde top jaryp keledi.
Bilim ordasynyń Jylandy mektebinde robototehnıka zerthanasynyń ashylýyna demeýshilik kórsetip, aýyl balalaryna úlken múmkindik syılaǵan mesenat, osy aýyl týmasy Baýyrjan Keńesbekulyna degen alǵystary sheksiz.
Sol sııaqty daryndy oqýshylardyń halyqaralyq jarysta baq synaýyna Jetisý oblysynyń ákimdigi men Jetisý oblystyq bilim basqarmasy da ıgi yqpal etip otyr.
Mundaı demeý men qoldaý qabiletti balalardyń jańa jetistikterge jetýine úlken serpin berip otyr.
Halyqaralyq jarysta WATER7 komandasy quramyndaǵy 11 oqýshy men 2 jetekshi jarys alańynda qazaqtyń qara dombyrasymen kúı oryndap, kók baıraqty jelbiretti.
