Mundaǵy basty maqsaty – salaýatty ómir saltyn jastar arasynda keńinen nasıhattaý, tabysty sportshylardyń keısin paıdalanyp, ár azamattyń chempıon bolýǵa laıyq ekenin kórsetý. Joba sheńberinde tek jattyǵýlar ǵana emes, ár túrli baǵyttaǵy sharalar kesheni uıymdastyrylady. Almatyda bastaý alǵan joba respýblıka kóleminde jalǵasady.
Is-sharaǵa Májilis depýtaty, «Alash Pride» klýbynyń negizin qalaýshy jáne prezıdenti Danııar Qasqaraýov, Almaty oblystyq máslıhat depýtaty, Saǵadat batyr atyndaǵy sport klýbynyń negizin qalaýshy, djıý-djıtsý jáne grepplıng sport sheberi Nursultan Orynbasarov, Almaty qalasy Jastar saıasaty basqarmasynyń basshysy Azız Kajdenbek, sondaı-aq elimizdiń ataqty sportshylary qatysty. Olardyń qatarynda ótken jylǵy Parıj Olımpıadasynyń kúmis júldegeri Narıman Qurbanov, aralas jekpe-jek sheberi Arman Ospanov, djıý-djıtsýdan álem chempıony, grepplıngten UWW federasııasynyń Almaty qalasy boıynsha prezıdenti Albert Aldııarov, UFC lıgasynda óner kórsetip júrgen jekpe-jek jaýyngeri Asý Almabaev bar. Sonymen qatar, is-sharaǵa qatysqan qoǵam belsendileri men qala jastary chempıondarmen erkin formatta suhbat qurdy.
Jastar qanatynyń kóshbasshysy Aqerke Iskanderovanyń aıtýynsha «Chempıondyq rýh» — tek sporttyq jattyǵýlar men jarystardy uıymdastyrý ǵana emes, jastardyń óz densaýlyǵyn kútýge jáne qoǵamda salaýatty ómir saltyn ilgeriletýge baǵyttalǵan ustanym deıdi.
«Bul joba sport pen rýhty birlestirip, qoǵamda ishki tártip, óz-ózine senim qalyptastyrýdy kózdeıdi. Eń bastysy – «Chempıondyq rýh» jobasy jastar arasyndaǵy agressııamen kúresip, olardyń bos ýaqytyn tıimdi ótkizýge, sportshylardyń kúshi men energııasyn durys baǵytta qoldanýǵa jol ashady. Bul bastama jastardy rýhanı, fızıkalyq jáne áleýmettik turǵydan damytyp, olardy jaýapty ári belsendi azamat bolýǵa yntalandyrady. Joba aıasynda aldaǵy ýaqytta salaýatty ómir saltyn nasıhattaıtyn túrli sharalar ótetin bolady. Onyń ishinde, sheberlik sabaqtary, sportshylarmen kezdesý, týrnırler jáne t.b.», dedi A. Iskanderova.
Jobanyń ambassadory, djıý-djıtsý men grepplıng boıynsha sport sheberi Nursultan Orynbasarov buqaralyq sportty damytyp, kópshilik arasynda nasıhattaýdyń mańyzy jaıynda aıtty, sondaı-aq qatysýshylarǵa arnaıy ashyq aspan astynda jattyǵý ótkizdi.
«Buqaralyq sporttyń adamnyń densaýlyǵyn jaqsartý, qoǵamdaǵy tártiptilik pen birlik sezimin arttyrý, sondaı-aq urpaq tárbıesindegi róli erekshe. Jastardy sportqa tartý arqyly ǵana biz olarǵa durys ómir saltyn ustanýǵa kómektese alamyz. Sporttyq jattyǵýlar men jarystar arqyly qoǵamda salaýatty ómir saltyn qalyptastyrý mańyzdy», dedi Nursultan Orynbasarov.
Tańǵy jattyǵýdyń eń jas qatysýshysy 4 jasar Álı óziniń ákesimen birge belsendilik tanytyp, kópshiliktiń nazaryn ózine aýdardy. Álıdiń sportqa degen qyzyǵýshylyǵy men energııasy ózge de qatysýshylarǵa stımýl boldy. Osyndaı belsendi qatysýshylarǵa arnaıy chempıondardyń qoltańbasy bar syılyqtar tabystaldy.
Aıta keteıik ataýly shara Almaty qalasy Jastar saıasaty basqarmasy qoldaýymen ótip jatyr. Joba aıasynda túrli sporttyq jarystar men trenıngter, fıtnes-jattyǵýlar men sheberlik synyptary, sondaı-aq arnaıy motıvasııalyq kezdesýler men semınarlar uıymdastyrylady.
